以賽亞書 第 3 章

1

(THR) Khòaⁿ ah, in-ūi Chú, bān-kun ê Iâ-hô-hoa, tùi Iâ-lō͘-sat-léng kap Iû-tāi tû--khì in só͘ óa-khò ê, só͘ i-óa ê, chiū-sī só͘ óa-khò ê bí-niû, só͘ óa-khò ê chúi;

(BCL) 看啊，因為主──萬軍的耶和華對耶路撒冷及猶大，除去所倚靠的，所依倚的，就是所倚靠的米糧，所倚靠的水；

2

(THR) tû--khì ióng-sū, kap chiàn-sū, sím-phòaⁿ-koaⁿ kap sian-ti, chiam-pok--ê kap tiúⁿ-ló;

(BCL) 除去勇士及戰士，審判官及先知，占卜者及長老，

3

(THR) ngó͘-sı̍p-hu-tióng kap chun-kùi ê lâng, bô͘-sū kap khiáu ê sai-hū, í-kı̍p gâu kiâⁿ hoat-su̍t ê.

(BCL) 五十夫長及尊貴的人，謀士及巧的師傅，以及行法術的。

4

(THR) Góa beh hō͘ gín-ná chòe in ê léng-siù, hō͘ eⁿ-á kóan-hat in.

(BCL) 我欲互囝仔做的領袖，互嬰仔管轄。

5

(THR) Peh-sìⁿ beh tāi-ke saⁿ ap-chè, ta̍k-lâng siū chhù-piⁿ ê ap-chè; siàu-liân lâng beh bú-bān lāu-lâng, pi-chiān ê lâng beh bú-bān chun-kùi ê lâng.

(BCL) 百姓欲大家相壓制；逐人受厝邊的壓制。少年人欲侮慢老人；卑賤的人欲侮慢尊貴的人。

6

(THR) Lâng beh tī i ê lāu-pē ê ke, khiú i ê hiaⁿ-tī, kóng, Lí ū i-ho̍k, tio̍h chòe góan ê koaⁿ-tiúⁿ; chit-ê tó-hōai ê kéng-hóng, thang kui lí ê chhiú liāu-lí.

(BCL) 人欲佇伊的老父的家伊的兄弟，講：你有衣服，著做阮的官長。此個倒壞的景況通歸你的手料理！

7

(THR) Hit-sî i beh tōa-siaⁿ kóng, Góa bô beh chòe i-tī lín ê; in-ūi góa ê ke bô bí-niû, iā bô i-ho̍k; lín m̄-thang siat-lı̍p góa chòe peh-sìⁿ ê koaⁿ-tiúⁿ.

(BCL) 彼時，伊欲大聲講：我無欲做醫治恁的；因為我的家無米糧，也無衣服，恁呣通設立我做百姓的官長。

8

(THR) Iâ-lō͘-sat-léng soe-pāi, Iû-tāi tó-hōai; in-ūi in ê chhùi-chı̍h í-kı̍p kiâⁿ-chòe kap Iâ-hô-hoa hóan-tùi, jiá--tio̍h I êng-kng ê ba̍k-chiu.

(BCL) 耶路撒冷衰敗，猶大倒壞；因為的嘴舌以及行做及耶和華反對，惹著伊榮光的目睭。

9

(THR) In ê bīn-sek kan-chèng ka-kī ê bô chèng-tı̍t; in kóng-khí ka-kī ê chōe-ok, pēng-bô ún-môa, chhin-chhiūⁿ Só͘-to-má chı̍t-iūⁿ. In ū chai-ē ah, in-ūi in ka-kī chhú chai-hāi.

(BCL) 的面色干證家己的無正直；講起家己的罪惡，並無隱瞞，親像所多瑪一樣。有災禍啊！因為家己取災害。

10

(THR) Lūn gī-lâng lín tio̍h kóng, I ū hok-khì, in-ūi beh chia̍h ka-kī kiâⁿ-chòe só͘ kiat ê ké-chí.

(BCL) 論義人恁著講：伊有福氣，因為欲食家己行做所結的果子。

11

(THR) Pháiⁿ-lâng ū chai-ē ah, i beh tú-tio̍h chai-lān; in-ūi beh chiàu i só͘-kiâⁿ-ê siū pò-èng.

(BCL) 歹人有災禍啊！伊欲抵著災難！因為欲照伊所行的受報應。

12

(THR) Lūn-kàu Góa ê peh-sìⁿ, gín-ná ap-chè in, hū-jîn-lâng kóan-hat in. Góa ê peh-sìⁿ ah, ín-chhōa lí--ê hō͘ lí kiâⁿ chha-chhok, koh húi-hōai lí só͘-kiâⁿ ê tō-lō͘.

(BCL) 論到我的百姓，囝仔壓制，婦仁人管轄。我的百姓啊，引導你的互你行差錯，閣毀壞你所行的道路。

13

(THR) Iâ-hô-hoa khí-lâi cheng-piān, khiā-teh sím-phòaⁿ hiah ê peh-sìⁿ.

(BCL) 耶和華起來爭辯，徛審判許個百姓。

14

(THR) Iâ-hô-hoa beh sím-mn̄g I peh-sìⁿ-tiong ê tiúⁿ-ló, kap in ê léng-siù, kóng, chia̍h-liáu phû-tô-hn̂g ê ké-chí-ê chiū-sī lín; tùi sòng-hiong lâng só͘-chhiúⁿ-ê lóng tī lín ê ke.

(BCL) 耶和華欲審問伊百姓中的長老及的領袖，講：食了葡萄園的果子的就是恁；對喪鄉人所搶的攏佇恁的家。

15

(THR) Lín siáⁿ-sū ap-chè Góa ê peh-sìⁿ, sàu sòng-hiong lâng ê bīn-phê? che sī Chú, bān-kun ê Iâ-hô-hoa, kóng ê.

(BCL) 恁啥事壓制我的百姓，掃喪鄉人的面皮？這是主──萬軍的耶和華講的。

16

(THR) Iâ-hô-hoa koh kóng, In-ūi Sek-an hiah ê cha-bó͘-kiáⁿ kiau-ngō͘, kiâⁿ-lō͘ ām-kún chhun tn̂g-tn̂g, khòaⁿ lâng sái ba̍k-bé, liam-kha kiâⁿ, kha-khôan khin-khiang háu;

(BCL) 耶和華閣講：因為錫安許個查某子驕傲，行路頷頸伸長長，看人使目尾，跕腳行，腳環鏗鏘哮，

17

(THR) só͘-í Chú beh hō͘ Sek-an hiah ê cha-bó͘-kiáⁿ chhàu-thâu kian-phí; Iâ-hô-hoa koh hō͘ in chhiah-sin lō͘-thé.

(BCL) 所以，主欲互錫安許個查某子臭頭堅疕；耶和華閣互赤身露體。

18

(THR) Kàu hit-jı̍t, Chú beh tû--khì in súi ê kha-khôan, thâu-mn̂g bāng, ge̍h-chiam;

(BCL) 到彼日，主欲除去娞的腳環、頭毛網、月簪、

19

(THR) hī-khôan, chhiú-so̍h, tà-bīn ê phè;

(BCL) 耳環、手鐲、罩面的帕、

20

(THR) hoe-bō, kha-liān, hoe-tòa, hiuⁿ-a̍h, hû-tē;

(BCL) 花帽、腳鍊、花帶、香盒、符袋、

21

(THR) chhiú-chí, phīⁿ-khôan;

(BCL) 手指、鼻環、

22

(THR) lé-ho̍k, gōa-thò, phi-kian, hô-pau;

(BCL) 禮服，外套、披肩、荷包、

23

(THR) chhiú-kiàⁿ, iù-tōe saⁿ, pau-thâu ê kun, jia seng-khu ê phè.

(BCL) 手鏡，幼苧衫、包頭的巾、遮身軀的帕。

24

(THR) Beh ū chhàu-khì lâi thòe phang-bī; soh-á lâi thòe io-tòa; thâu-khak kng-khō-khō lâi thòe súi ê thâu-mn̂g; môa-pò͘ hâ-io lâi thòe súi ê i-ho̍k; ēng hé ê kù-siong lâi thòe i súi ê bīn-māu.

(BCL) 欲有臭氣來替芳味，索仔來替腰帶，頭殼光裸裸來替娞的頭毛，麻布縖腰來替娞的衣服，用火的灸傷來替伊娞的面貌。

25

(THR) Lí ê ta-po͘-teng beh tó tī to-ē; lí ê ióng-sū beh sí tī chiàn-tīn.

(BCL) 你的查甫丁欲倒佇刀下；你的勇士欲死佇戰陣。

26

(THR) I ê siâⁿ-mn̂g beh pi-siong ai-kiò; i beh léng-chēng chē tī thô͘-kha.

(BCL) 伊的城門欲悲傷、哀叫；伊欲冷靜坐佇土腳。

Bible Color Mark

• 台語漢字羅馬本
• 巴克禮全羅