以賽亞書 第 20 章

1

(THR) A-su̍t ông Sat-jíⁿ-kun chhe Tha-jíⁿ-thàm kàu A-sı̍t-tu̍t hit-nî, Tha-jíⁿ-thàm chiū kong-phòa A-sı̍t-tu̍t lâi chhú i;

(BCL) 亞述王撒珥根差他珥探到亞實突彼年，他珥探就攻破亞實突來取伊。

2

(THR) hit-sî Iâ-hô-hoa thok-tiōng A-mô͘-su ê kiáⁿ Í-sài-a kóng, Khì--ah, lí tio̍h tháu lí io--nih ê môa-pò͘, thǹg lí kha--nih ê ôe. Í-sài-a chiàu án-ni chòe, thǹg-theh chhiah-kha lâi kiâⁿ.

(BCL) 彼時，耶和華託仗亞摩斯的子以賽亞講：「去啊，你著解你腰裡的麻布，褪你腳裡的鞋。」以賽亞照按呢做，褪裼赤腳來行。

3

(THR) Iâ-hô-hoa kóng, Góa ê lô͘-po̍k Í-sài-a thǹg-theh chhiah-kha lâi kiâⁿ saⁿ-nî kú, chòe koan-hē tī Ai-kı̍p kap Kó͘-sı̍t ê tiāu-thâu kî-sū;

(BCL) 耶和華講：「我的奴僕以賽亞褪裼赤腳來行三年久，做關係佇埃及及古實的兆頭奇事。

4

(THR) chhin-chhiūⁿ án-ni, A-su̍t ông beh chiong Ai-kı̍p ê siū-lia̍h--ê, Kó͘-sı̍t ê siū chhian-sóa--ê chhōa khì, bô-lūn ló-iù, thǹg-theh chhiah-kha, lō͘-chhut ē-thé, hō͘ Ai-kı̍p kiàn-siàu.

(BCL) 親像按呢，亞述王欲將埃及的受掠者，古實的受遷徙者導去，無論老幼，褪裼赤腳，露出下體，互埃及見誚。

5

(THR) In beh in-ūi só͘ ǹg-bāng ê Kó͘-sı̍t, só͘ khoa-kháu ê Ai-kı̍p, lâi kiaⁿ-hiâⁿ kiàn-siàu.

(BCL) 欲因為所向望的古實，所誇口的埃及，來驚惶見誚。

6

(THR) Hit-sî chiah ê iân-hái khiā-khí ê peh-sìⁿ beh kóng, Khòaⁿ ah, lán chiah-ê pêng-sò͘ só͘ ǹg-bāng--ê, chiū-sī lán in-ūi beh thoat-lī A-su̍t ông; cháu-khì kiû i chín-kiù--ê, kì-jiân án-ni, lán thái-thó ōe tô-thoat ah?

(BCL) 「彼時，諸個沿海徛起的百姓欲講：『看啊，咱諸個平素所向望者，就是咱因為欲脫離亞述王走去求伊拯救者，既然按呢，咱豈可會逃脫啊？』」

Bible Color Mark

• 台語漢字羅馬本
• 巴克禮全羅