以賽亞書 第 15 章

1

(THR) Lūn Mô͘-ap ê be̍k-sī. In-ūi chı̍t-mî ê tiong-kan Mô͘-ap ê A-jíⁿ pìⁿ-chòe hong-hòe, bô--khì; in-ūi chı̍t-mî ê tiong-kan Mô͘-ap ê Ki-jíⁿ pìⁿ-chòe hong-hòe, bô--khì.

(BCL) 論摩押的默示：因為一暝的中間，摩押的亞珥變做荒廢，無去；因為一暝的中間，摩押的基珥變做荒廢，無去。

2

(THR) I chiūⁿ kàu Pa-ek, koh khì Tí-pún, kàu kôaiⁿ ê só͘-chāi thî-khàu; Mô͘-ap lâng in-ūi Nî-pho kap Bí-tí-pa ai-khàu, ta̍k-ê thâu-khak kng-liu-liu, chhùi-chhiu thì-liáu-liáu.

(BCL) 伊上到巴益，閣去底本，到高的所在啼哭。摩押人因為尼波及米底巴哀哭，逐個頭殼光溜溜，嘴鬚剃了了。

3

(THR) In tī koe-chhī--nih io lóng hâ môa-pò͘; tī chhù-téng kap hit ê khoan-khoah ê só͘-chāi, ta̍k-lâng lóng thî-khàu, ba̍k-sái tı̍t-tı̍t lâu.

(BCL) 佇街市裡腰攏縖麻布，佇厝頂及彼個寬闊的所在逐人攏啼哭，目屎直直流。

4

(THR) Hi-sı̍t-pún kap Í-lī-a-lī, pi-ai ê siaⁿ thiaⁿ kàu Ngá-cha̍p; só͘-í Mô͘-ap tòa kun-khì-ê tōa-siaⁿ hoah-hiàm; i ê sim ngia̍uh-ngia̍uh-chhoah.

(BCL) 希實本及以利亞利悲哀的聲聽到雅雜，所以摩押帶軍器的大聲喝喊，伊的心愕愕惙。

5

(THR) Góa ê sim ūi-tio̍h Mô͘-ap pi-ai; i ê kùi-cho̍k cháu kàu Só-jíⁿ, kàu Í-ki-la̍h Si-lī-si-a; in chiūⁿ Lō͘-hi ê lō͘, ná-kiâⁿ ná-háu; tī Hô-lô-liām ê lō͘, in-ūi húi-bia̍t chhut ai-khàu ê siaⁿ.

(BCL) 我的心為著摩押悲哀；伊的貴族走到瑣珥，到伊基拉．施利施亞。上魯希的路，愈行愈哮；佇何羅念的路，因為毀滅出哀哭的聲。

6

(THR) In-ūi Lêng-lîm ê chúi beh ta--khì; in-ūi chhiⁿ-chhùi ê chháu ko͘-tâ; o͘-iù ê chhài-soe bia̍t-bô, chhiⁿ-chhùi ê mı̍h lóng bô--khì.

(BCL) 因為寧林的水欲乾去，因為青翠的草枯焦，黑幼的菜蔬滅無，青翠的物，攏無去。

7

(THR) In-ūi án-ni Mô͘-ap lâng só͘ tit-tio̍h ê châi-bu̍t kap só͘ chek-chū-ê, lóng beh tòa kè liú-chhiū khoe;

(BCL) 因為按呢，摩押人所得著的財物及所積聚的攏欲帶過柳樹溪。

8

(THR) in-ūi ai-chhám ê siaⁿ piàn-móa Mô͘-ap ê sì-kéng, ai-khàu ê siaⁿ thiaⁿ kàu Í-ki-liân, ai-khàu ê siaⁿ thiaⁿ kàu Pí-jíⁿ-í-lîm.

(BCL) 因為哀慘的聲遍滿摩押的四境；哀哭的聲聽到以基蓮；哀哭的聲聽到比珥以琳。

9

(THR) In-ūi Tí-bûn ê chúi ū huih móa-móa; Góa beh ke-thiⁿ Tí-bûn ê chai-lān, hō͘ sai lâi tui-jip Mô͘-ap tô-thoat ê peh-sìⁿ, kap hit só͘-chāi só͘-chhun ê lâng.

(BCL) 因為底們的水有血滿滿；我欲加添底們的災難，互獅來追摩押逃脫的百姓，及彼所在所剩的人。

Bible Color Mark

• 台語漢字羅馬本
• 巴克禮全羅