申命記 第 25 章

1

(THR) Lâng nā ū oan-ke lâi tùi-sìn, koaⁿ-hú phòaⁿ-tòan i, chiū tio̍h tēng gī-lâng chòe-gī, tēng pháiⁿ-lâng chòe-pháiⁿ.

(BCL) 「人若有冤家來對訊，官府判斷伊就著定義人做義，定歹人做歹。

2

(THR) Pháiⁿ-lâng nā eng-kai siū-phah, sím-phòaⁿ-koaⁿ tio̍h hō͘ i phak tī tōe-nı̍h, tī i ê bīn-chêng, chiàu i ê chōe, chiàu siàu-gia̍h phah i;

(BCL) 歹人若應該受拍，審判官著互伊仆佇地裡，佇伊的面前照伊的罪，照數額拍伊。

3

(THR) to̍k-to̍k thang phah i sì-cha̍p-ē, m̄-thang kè siàu-gia̍h; nā kè siàu-gia̍h, phah i khah-chōe-ē, chiū lí ê hiaⁿ-tī hō͘ lí khòaⁿ-khin.

(BCL) 獨獨通拍伊四十下，呣通過數額；若過數額，拍伊卡多下就你的兄弟互你看輕。

4

(THR) Gû teh lún gō͘-kak, m̄-thang láng i ê chhùi.

(BCL) 「牛碖五穀，呣通籠伊的嘴。」

5

(THR) Hiaⁿ-tī saⁿ-kap khiā-khí, kî-tiong nā chı̍t-ê sí bô kiáⁿ, sí-lâng ê bó͘ m̄-thang kè gōa-lâng, i tiōng-hu ê sió-tī tio̍h jı̍p-khì i hia, chhōa i chòe-bó͘, lâi chīn sió-chek ê pún-hūn;

(BCL) 「兄弟相及徛起，其中若一個死，無子，死人的某呣通嫁外人，伊丈夫的小弟著入去伊遐，娶伊做某，來盡小叔的本份。

6

(THR) i só͘ siⁿ ê tōa-kiáⁿ, tio̍h sòa-chiap sí ê hiaⁿ ê bêng-hūn, bián-tit i ê miâ tī Í-sek-lia̍t-tiong siau-bia̍t.

(BCL) 伊所生的大子，著續接死的兄的名份，免得伊的名佇以色列中消滅。

7

(THR) Hit-lâng nā m̄ gōan-ì chhōa i ê hiaⁿ-só, i ê hiaⁿ-só chiū tio̍h kàu siâⁿ-mn̂g ê tiúⁿ-ló hia kóng, Góa ê tiōng-hu ê sió-tī m̄-khéng tī Í-sek-lia̍t-tiong kā i ê hiaⁿ thôan chı̍t ê miâ-jī, bô beh kā góa chīn sió-chek ê pún-hūn.

(BCL) 彼人若呣願意娶伊的兄嫂，伊的兄嫂就著到城門的長老遐，講：『我的丈夫的小弟呣肯佇以色列中給伊的兄傳一個名字，無欲給我盡小叔的本份。』

8

(THR) I siâⁿ-lāi ê tiúⁿ-ló chiū tio̍h kiò i lâi, kā i kóng; i nā chip-ì kóng, Góa bô beh chhōa i;

(BCL) 伊城內的長老就著叫伊來給伊講，伊若執意講：『我無欲娶伊』，

9

(THR) i ê hiaⁿ-só chiū tio̍h tī tiúⁿ-ló ê bīn-chêng chiū-kūn i, thǹg hit-lâng kha-nı̍h ê ôe, phùi-nōa tī i ê bīn, kóng, Kìⁿ-nā bô beh ūi-tio̍h hiaⁿ kiàn-lı̍p i ê ke ê, tio̍h án-ni khóan-thāi i;

(BCL) 伊的兄嫂就著佇長老的面前就近伊，褪彼人腳裡的鞋，呸涎佇伊的面，講：『見若無欲為著兄建立伊的家的著按呢款待伊。』

10

(THR) tī Í-sek-lia̍t-tiong, i ê miâ beh chheng chòe thǹg-ôe-ê ê ke.

(BCL) 佇以色列中，伊的名欲稱做褪鞋者的家。」

11

(THR) Nā ū nn̄g-lâng saⁿ-phah, kî-tiong chı̍t-lâng ê bó͘ kūn-óa lâi, beh kiù i ê tiōng-hu thoat-lī phah i ê lâng ê chhiú, chhun-chhiú khîⁿ-tiâu hit-lâng ê ē-thé;

(BCL) 「若有二人相拍，其中一人的某近倚來，欲救伊的丈夫脫離拍伊的人的手，伸手擒住彼人的下體，

12

(THR) chiū tio̍h chām-tn̄g hū-jîn-lâng ê chhiú, ba̍k-chiu m̄-thang khó-lîn i.

(BCL) 就著斬斷婦仁人的手，目睭呣通可憐伊。

13

(THR) Lí ê tē-á-lāi m̄-thang ū nn̄g-iūⁿ ê phêng-chí, ū-lia̍p tōa, ū-lia̍p sòe;

(BCL) 「你的袋仔內呣通有二樣的秤子，有粒大有粒細。

14

(THR) chhù-lāi m̄-thang ū nn̄g-iūⁿ ê chin, táu, ū-ê tōa, ū-ê sòe;

(BCL) 厝內呣通有二樣的升斗，有的大有的細。

15

(THR) tio̍h ēng chún-chún kong-pêng ê phêng-chí, chún-chún kong-pêng ê chin, táu; thang hō͘ lí tī Iâ-hô-hoa lí Siōng-tè só͘ siúⁿ-sù ê tōe chia̍h tn̂g hè-siū;

(BCL) 著用準準公平的秤子，準準公平的升、斗。通互你佇耶和華──你上帝所賞賜的地食長歲壽。

16

(THR) in-ūi kìⁿ-nā kiâⁿ chiah ê tāi-chì, kap kiâⁿ put-gī ê, lóng sī Iâ-hô-hoa lí Siōng-tè só͘ iàm-ò͘ⁿ-ê.

(BCL) 因為見若行諸個代誌及行不義的，攏是耶和華──你上帝所厭惡的。」

17

(THR) Lí tio̍h kì-tit lín chhut Ai-kı̍p ê sî, A-má-le̍k lâng tī lō͘-nı̍h só͘ khóan-thāi lí ê;

(BCL) 「你著記得恁出埃及的時，亞瑪力人佇路裡所款待你的。

18

(THR) i tī lō͘-nı̍h tú-tio̍h lí, tng lí khùn-khó͘ ià-siān ê sî, ū cháiⁿ-iūⁿ phah lí āu-tūi, chiū-sī tī lí āu-bīn ê lóan-jio̍k ê; i iā bô kiaⁿ-ùi Siōng-tè.

(BCL) 伊佇路裡抵著你，當你困苦厭倦的時，有怎樣拍你後隊就是佇你後面的軟弱的，伊也無驚畏上帝。

19

(THR) Só͘-í kàu Iâ-hô-hoa lí Siōng-tè kiù lí thoat-lī sì-ûi lóng-chóng ê tùi-te̍k, tī Iâ-hô-hoa lí Siōng-tè siúⁿ-sù lí chòe-gia̍p ê tōe, tit-tio̍h pêng-an, hit-sî lí tio̍h chiong A-má-le̍k ê miâ-jī, tùi thiⁿ-ē chhat-siau, m̄-thang bōe-kì-tit.

(BCL) 所以到耶和華──你上帝救你脫離四圍攏總的對敵，佇耶和華──你上帝賞賜你做業的地得著平安。彼時，你著將亞瑪力的名字對天下擦消，呣通記得。」

Bible Color Mark

• 台語漢字羅馬本
• 巴克禮全羅