路得記 第 1 章 - 台語漢字羅馬本

1

當士師辦政事的時，彼個地抵著飢荒。佇猶大伯利恆，有一個人及伊的某二個子出外去摩押地。

2

彼人名叫以利米勒，伊的某名叫拿俄米；伊二個子，名瑪倫、基連，攏是猶大伯利恆的以法他人。到摩押地，就佇遐徛起。

3

後來拿俄米的丈夫以利米勒死，放伊及伊二個子。

4

二個子娶摩押的查某子做某，一個名叫俄珥巴，一個名叫路得，踮佇遐約略十年。

5

瑪倫及基連二人也死，剩彼個婦仁人無丈夫，也無子。

6

伊就及二個媳婦起來，欲對摩押地倒去；因為伊佇摩押地聽見耶和華眷顧伊的百姓，賞賜米糧。

7

伊就對伊徛起的所在出去，二個媳婦及伊去，行路欲倒去猶大地。

8

拿俄米給二個媳婦講：「恁去啊，逐個倒去老母的厝。願耶和華好款待恁，親像恁款待已經死的人及我一樣！

9

願耶和華賞賜恁逐人佇丈夫的家得著平安！」就及唚嘴。就出聲啼哭，

10

給伊講：「呣啊，阮欲及你相及倒去你的百姓遐。」

11

拿俄米講：「我的查某子啊，倒去啊！啥事欲及我去啊？我猶會懷胎生子做恁的丈夫嗎？

12

我的查某子啊，倒去啊，去啊！我已經年老，會閣有丈夫；我若講，我猶有向望，我今暝若有丈夫也會生子，

13

恁豈會聽候大漢嗎？恁豈會家己守無嫁人嗎？我的查某子啊，莫得按呢。我為著恁盡在憂苦，因為耶和華伸手攻擊我。」

14

閣出聲哭，俄珥巴及乾家唚嘴，獨獨路得及伊放離。

15

伊講：「看啊，你的同姒已經倒去伊的百姓伊的上帝遐，你也著隨你的同姒倒去！」

16

路得講：「莫得勸我離開你，倒去無隨你。因為你去遐，我也欲去遐；你歇佇遐，我也欲歇遐；你的百姓欲做我的百姓，你的上帝也欲做我的上帝。

17

你死佇遐，我也死佇遐，埋葬佇遐。除死以外若有甚麼互你我相離！願耶和華加倍責罰我。」

18

伊看見伊決意欲及伊去，就無閣對伊講起。

19

對按呢二人相及行，來到伯利恆。到伯利恆，通城為著攏泏起來。許個婦仁人講：「這是拿俄米嗎？」

20

伊應講：「莫得叫我拿俄米，著叫我瑪拉，因為全能者款待我真艱苦。

21

我出去的時滿足，耶和華互我空空倒來。耶和華已經責備我來證明我，全能者已經苦楚我。恁啥事叫我拿俄米啊？」

22

按呢拿俄米倒來，伊的媳婦摩押的查某子路得，對摩押地倒來的也及伊來，到伯利恆抵仔是起手割大麥的時。