羅馬書 第 16 章 - 台語漢字羅馬本

1

我對恁舉薦咱的姊妹非比，就是堅革哩教會的差用。

2

互恁為著主接待伊，照聖徒所合宜。伊有欠用恁幫助的，就幫助伊，因為伊曾扶助多多人，也曾扶助我。

3

請安百基拉、亞居拉。佇基督耶穌及我同著磨者，

4

也為著我的生命曾拼死。呣若我感謝，就外邦的眾教會也是按呢。

5

閣請安聚集佇伊的家的教會。請安我所疼的以拜尼土；伊是亞西亞頭一個屬基督的。

6

請安馬利亞；伊曾為著恁多多著磨。

7

請安我的親戚安多尼古、猶尼亞；曾及我同關監；有名聲佇使徒中，閣代先我佇基督。

8

請安暗伯利佇主互我所疼的。

9

請安佇基督及我同著磨的耳巴奴，以及我所疼的士大古。

10

請安亞比利佇基督有經驗的。請安亞利多布家內的人。

11

請安我的親戚希羅天。請安拿其數家內佇主的人。

12

請安佇主著磨的土非拿、土富撒。請安所疼的彼息，曾佇主多多著磨的。

13

請安佇主得著揀選的魯孚及伊的老母；也是我的老母。

14

請安亞遜其土、弗勒干、黑米、八羅巴、黑馬，以及及佇的兄弟。

15

請安非羅羅古及猶利亞，尼利亞及伊的姊妹，及阿林巴以及及佇眾聖徒。

16

恁著用聖的相唚，大家相請安。基督的眾教會請安恁。

17

兄弟啊，我勸恁著省察許個分黨塞礙的，就是背恁所學習的教示的，閣著閃避。

18

因為此號人無服事咱的主基督，是服事家己的腹肚，用的奇巧諂媚的話迷惑正直的人的心。

19

因為恁的順服已經遍傳佇眾人，所以我為著恁歡喜；獨獨論到好事，我愛恁有智識，論到歹事，就愛恁清白。

20

賞賜平安的上帝欲緊緊踏碎撒但佇恁的腳下。願咱的主耶穌基督的恩及恁佇。

21

及我同著磨的提摩太，以及我的親戚路求、耶孫、所西巴德，請安恁。

22

我德丟就是寫此張批的，佇主請安恁。

23

我及全教會永歇伊兜的該猶請安恁。

24

城內管庫房的以拉都及兄弟括土請安恁。

25

上帝會堅固恁照我的福音，及所宣傳耶穌基督的事，也照永世代所隱密奧妙的闡明。

26

此個奧妙此霎有著現，也對先知的冊，照永遠上帝的命令來指示萬邦，互對信來順趁。

27

願榮光對耶穌基督歸佇獨一有智慧的上帝，代代無息。阿們！