啟示錄 第 1 章 - 台語漢字羅馬本

1

耶穌基督的啟示，就是上帝所互伊，來指示伊諸個奴僕的，就是欲緊緊成的事。伊就託伊的天使去指點伊的奴僕約翰。

2

約翰就是將上帝的道及耶穌基督的干證，見若伊所有看見的來做干證。

3

凡若讀及聽許個讖語來守其中所記載的，有福氣，因為日期近啦。

4

約翰寄批互亞西亞七個教會。願恁得著恩典、平安！對彼個現在佇、早佇、將來亦佇的，以及對伊座位前七個神，

5

閣對耶穌基督就是忠信的干證、死人中頭一個活的、地上諸個王的主宰。伊疼咱，用伊的血解放咱脫離咱的罪，

6

互咱做國，做伊的父上帝的祭司。願榮光、權能歸佇伊，到代代。阿們！

7

伊坐雲來！眾目睭欲看見伊，連鑿伊的人亦欲看見伊；地上的族攏欲為著伊來啼哭。實在是按呢。阿們！

8

主上帝講：「我是阿利法，閣是奧美加，現在佇、早佇、將來佇的，是全能者。」

9

我──約翰就是恁的兄弟，相及有份佇耶穌的患難，及伊的國，及伊的吞的，為著上帝的道，及耶穌的干證，曾佇一個海嶼名叫拔摩。

10

佇主的日，我互神感動，聽見佇我的後面有大聲親像號頭，講：

11

「你所看見的著寫佇冊裡，寄互彼七個教會就是以弗所、士每拿、別迦摩、推雅推喇、撒狄、非拉鐵非、老底嘉。」

12

我就越轉身，愛看及我講話的聲；已經越轉，就看見七支的金燈台。

13

燈台中有親像人子的，身軀穿長衫，胸坎縖金帶。

14

伊的頭殼及頭毛攏白，親像白的綿，親像雪；伊的目睭親像火焰；

15

伊的腳親像光亮的銅，親像過火爐鍛煉的；聲親像多多條水的聲。

16

佇伊的正手有七粒星，對伊的嘴吐出雙面利的劍；伊的面貌親像炎日射出光。

17

我看見伊，就仆佇伊的腳前，親像死。伊用正手按我，講：「莫得驚！我是起頭的，及續尾的，亦是活的；

18

我曾死，今你看，我是活到代代；閣有死無及陰府的鎖匙。

19

所以你著將所看見的，以及現今所有的，及後來欲成的事，寫伊。

20

你所看見、我正手頂七粒星的奧妙及七支的金燈台，七粒星就是七個教會的使者，七支燈台就是七個教會。」