詩篇 第 98 章 - 台語漢字羅馬本

1

〔一篇詩。〕恁著向耶和華唱新的歌！因為伊曾行奇妙的事；伊的正手及伊聖的手骨已經為家己行拯救。

2

耶和華互人知伊的拯救，佇列邦人的目睭前顯明伊的公義；

3

伊記念伊對以色列家所發出的慈愛及信實。地的四角攏看見咱的上帝的拯救。

4

全地攏著向耶和華出歡喜的聲；著出大聲，歡喜唱歌謳咾伊！

5

著彈琴唱歌謳咾耶和華，著彈琴和詩歌的聲謳咾伊！

6

用號頭及哨角的聲，佇君王耶和華的面前出歡喜的聲！

7

願海及其中所充滿的攏著出大聲；世界及踮佇彼中間的亦著出聲。

8

願大水拍手掌；願諸個山佇耶和華的面前出歡喜的聲；

9

因為伊來欲審判全地。伊欲照公義審判世界，照伊的正直審判列邦。