詩篇 第 86 章 - 台語漢字羅馬本

1

〔大衛的祈禱。〕耶和華啊，求你俯耳孔聽我，因為我是困苦喪鄉的。

2

求你保存我的生命，因為我是虔誠的人。我的上帝啊，你的奴僕倚靠你，求你拯救伊！

3

主啊，求你憐憫我，因為我通日求叫你。

4

主啊，求你互你的奴僕心歡喜，因為我用我的心仰望你。

5

主啊，因為你是好，歡喜赦免人，有豐盛的慈愛賞賜凡若求叫你的人。

6

耶和華啊，求你俯耳孔聽我的祈禱，俯落聽我懇求的聲。

7

佇我患難的日欲求叫你，你欲應我。

8

主啊，諸個上帝的中間無一個會比得你；你的所做亦無通比並。

9

主啊，你所造的萬邦攏欲來仆拜佇你的面前；亦欲榮光你的名。

10

因為你做大，閣行奇妙的事；只有你是上帝。

11

耶和華啊，求你將你的道路指示我；我欲照你的真理來行；互我專一的心敬畏你的名！

12

主──我的上帝啊，我欲全心謳咾你；我欲榮光你的名，到永遠。

13

因為，你對我發出大的慈愛；你救我的生命免落極深的陰間。

14

上帝啊，驕傲的人起來攻擊我，閣有強暴的黨數想我的生命，無敬奉你佇的面前。

15

主啊，你是仁慈恩典的上帝，無快快受氣，閣有豐盛的慈愛及誠實。

16

求你越過來看我，可憐我，將你的氣力賞賜你的奴僕，救你的女婢的子。

17

求你顯出恩典我的憑據，互怨恨我的人看見來見誚，因為耶和華──你幫助我，安慰我。