詩篇 第 3 章 - 台語漢字羅馬本

1

〔大衛閃避伊的子押沙龍的時，來做的詩。〕耶和華啊，我的對敵即呢多；多多人起來攻擊我。

2

多多人議論我講：伊無通得著上帝的拯救。（細拉）

3

總是耶和華──你是我四圍的盾牌，是我的榮光，閣是互我的頭抬高者。

4

我用我的聲求叫耶和華，伊對伊的聖山應我。（細拉）

5

我倒我睏，我精神，因為耶和華攏保護我。

6

雖然千萬人起來圍纍攻擊我，我亦無驚。

7

耶和華啊，求你起來！我的上帝啊，求你拯救我！因為你搧我一切對敵的嘴，拍折歹人的嘴齒。

8

拯救屬佇耶和華；願你賜福你的百姓。（細拉）