詩篇 第 24 章 - 台語漢字羅馬本

1

〔大衛的詩〕地及其中所充滿的，世界及踮佇伊中間的，攏屬耶和華。

2

伊將地建立佇海的頂面，安置佇大水的頂面。

3

是誰會上耶和華的山？是誰會徛佇伊聖的所在？

4

就是手清氣心清潔、存心無向虛假、咒誓無囥奸詭的人。

5

此號人欲得著耶和華賜福，閣對救伊的上帝得著義。

6

諸個是尋耶和華的族類，雅各的上帝啊，這是愛見你的面的人。（細拉）

7

城門啊，抬起恁的頭！永遠的門啊，恁著受舉起！榮光的王欲入！

8

彼個榮光的王是是誰？就是大氣力大權能的耶和華，佇交戰有大權能的耶和華！

9

城門啊，抬起恁的頭！永遠的門啊，恁亦著抬起！榮光的王欲入！

10

彼個榮光的王是是誰？萬軍的耶和華，伊是榮光的王！（細拉）