詩篇 第 146 章 - 台語漢字羅馬本

1

恁著謳咾耶和華！我的心啊，你著謳咾耶和華！

2

我一生欲謳咾耶和華！我猶活的時欲唱歌謳咾我的上帝！

3

恁莫得倚靠君王，莫得倚靠世間人；一點仔會幫助。

4

伊一下斷氣，就歸土；伊所計劃的，佇彼日就消滅。

5

有雅各的上帝做伊的幫助，向望伊的上帝──耶和華的，此號人有福氣！

6

伊是創造天、地、海，及其中的萬物；伊保守誠實，到佇永遠。

7

伊為著受冤屈的人伸冤，賞賜食物互枵餓者。耶和華解放受關監者；

8

耶和華開睛暝人的目睭；耶和華扶起受壓制的人。耶和華疼惜義人。

9

耶和華保護出外人，扶持孤兒寡婦，獨獨歹人的道路互伊彎曲。

10

耶和華欲做王，到永遠！錫安啊，你的上帝欲做王，到萬代！恁著謳咾耶和華！