詩篇 第 138 章 - 台語漢字羅馬本

1

〔大衛的詩。〕我欲專心感謝你，佇諸個上帝的面前欲唱歌謳咾你。

2

我欲向你的聖殿跪拜，因為你的慈愛及誠實謳咾你的名；因為你互你的話做大，贏過你所有的名。

3

我求叫的日，你就應我，鼓舞我，互我的心有氣力。

4

耶和華啊，世上的君王攏欲感謝你，因為有聽見你的嘴所講的話。

5

欲唱歌謳咾耶和華的行做，因為耶和華的榮光真大。

6

耶和華雖然真高，猶久看顧卑微的人；總是伊對遠遠看出驕傲的人。

7

我雖然行佇患難中，你欲互我活；我的對敵受氣，你欲伸手來抵當伊；你的正手亦欲救我。

8

關係我的事耶和華欲成伊；耶和華啊，你的慈愛永遠佇！求你莫得放拺你的手所造的。