民數記 第 9 章 - 台語漢字羅馬本

1

出埃及二年正月，耶和華佇西奈曠野命令摩西講：

2

「以色列人應該佇定著的日期守過節，

3

佇本月十四日黃昏的時，恁著佇所定著的日守伊，照伊一切的律例一切的法度來守伊。」

4

對按呢摩西吩咐以色列人守過節。

5

正月十四日黃昏的時，就佇西奈的曠野，守過節。見若耶和華所命令摩西的，以色列人攏照按呢行。

6

有幾若人互人的身屍染垃墋，會佇彼日守過節。當彼日到摩西、亞倫的面前，

7

許個人給講：「阮因為互人的身屍染垃墋，啥事阻擋阮、通佇以色列中佇所定著的日期獻禮物互耶和華啊？」

8

摩西給講：「恁徛聽候，我欲聽耶和華怎樣吩咐恁。」

9

耶和華吩咐摩西講：

10

「你著吩咐以色列人講：或是恁抑是恁的後裔的中間，若有人互身屍染垃墋，抑是遠遠佇路裡，猶原著守耶和華的過節。

11

著佇二月十四日黃昏的時，來守伊。參無酵餅及苦菜來食。

12

呣通留一點仔到隔早起；羊仔的骨一支也呣通拍折。著照過節諸個律例來守伊。

13

總是人若清氣也呣是佇路中若家己推辭呣守過節，著對伊的百姓中剪除彼個人；因為伊佇所定著的日無獻禮物互耶和華，彼人著擔當伊的罪。

14

若有外人寄腳佇恁中間，愛守耶和華的過節，伊著照過節的律例法度來行，出外人及本地人，著同一個律例來行。」

15

起會幕彼日，有雲遮伊的會幕，就是證據的布棚；對下昏到早起，有親像火的款式，蓋佇會幕。

16

常常是按呢，雲遮伊，暝時親像火的款式。

17

雲對布棚收上去，以色列人就起身；雲停的所在，以色列人就紮營佇遐。

18

以色列人照耶和華的命令起身，也照耶和華的命令安營。雲停佇會幕頂的時，猶原安營佇遐。

19

雲佇會幕頂停多多日，以色列人就守耶和華所交代的無起身。

20

有時雲佇會幕頂幾若日，照耶和華的命令猶原安營佇遐，也照耶和華的命令起身。

21

有時雲遮對下昏到早起；早起時雲收上去，就起身。無論日時暝時，雲收上去，就起身。

22

雲停佇會幕，無論是二日，是一月日，是一年，以色列人猶原安營佇遐無起身；總是雲收上去，就起身。

23

趁耶和華的命令安營，也趁耶和華的命令起身。守耶和華所交代的，攏照耶和華託摩西所命令的。