民數記 第 35 章 - 台語漢字羅馬本

1

耶和華佇摩押的平洋──約但河邊、耶利哥對面吩咐摩西講：

2

「你命令以色列人，著對所得著的業用城互利未人徛起，也著用城四圍的郊野互利未人。

3

城欲互徛起，郊野欲做的牛、羊、財物，及逐樣精牲的路用。

4

恁所互利未人城外的郊野，對城腳四圍量出一千肘。

5

你佇城外量伊，東勢二千肘，南勢二千肘，西勢二千肘，北勢二千肘，城佇中央；這是欲互做城的郊野。

6

恁所互利未人許個城，其中著六個逃閃的城，恁著設立伊互死人的通逃走佇遐。諸個以外著閣互四十二個城。

7

恁著互利未人的城，共四十八，城及郊野攏著互。

8

論到恁對以色列人的產業中所互利未人的城；對業多的取卡多城，對業少的取少；各照所承接的業撥出城互利未人。」

9

耶和華吩咐摩西講：

10

「你著吩咐以色列人給講：恁過約但河，入迦南地，

11

就著撥出幾個城，互恁做逃閃的城，互錯誤死人的兇身通逃走佇遐。

12

諸個城通互恁閃避彼個報仇的人，互兇身無致到死，聽候伊徛佇會眾的面前受審判。

13

恁所撥出來的城，著做恁六個逃閃的城。

14

佇約但河外著撥出三個城，佇迦南地也著撥出三個城，做逃閃的城。

15

此六個城著互以色列人及中間的出外人，及寄腳的，做逃閃的路用，互錯誤人的通走去遐。

16

「設使人用鐵器拍人，致到死，伊就是兇犯；兇犯的確著互伊死。

17

伊的手若用會互人死的石擲人，致到人死，伊就是兇犯；兇犯的確著死。

18

伊的手若用會互人死的柴拍人，致到人死，伊就是兇犯；兇犯的確著死。

19

報人命的本身著死彼個兇犯，一下抵著伊就著伊。

20

人若怨恨彼人來給伊捙倒，抑是匿用物擲伊，致到死，

21

豈採因為挾恨用手拍人，致到死，就彼個拍人的的確著死。因為伊真正是兇犯；報人命的抵著兇犯就死伊。

22

「設使人無挾恨，忽然捙伊，抑是無匿用物擲伊，

23

抑是無看見的時用會拍死人的石頭擲著伊，來致到死，及伊本無冤讎，也無意思欲害伊。

24

會眾就著照許個法度，佇拍死人的及報人命者的中間審判伊。

25

會眾著救彼個錯誤人的脫離報人命者的手，會眾也著互伊倒轉伊所走入逃閃的城。伊著踮佇彼內面，聽候到抹聖油的祭司頭死。

26

總是錯誤死人的，無論怎樣，若出去伊所走入逃閃的城的境外，

27

報人命的若佇逃閃的城的境外抵著伊，來死彼個兇犯，報人命的就無死人的罪。

28

因為伊應該著踮伊逃閃的城，聽候祭司頭死。祭司頭死了後，錯誤人的才通倒去伊產業的地。

29

這佇恁一切徛起的所在，欲做恁恁逐世代的法律。

30

「見若死人，彼個兇犯著照幾若個干證的人的話來互伊死，若只有一人做干證就呣通互人死。

31

死人、犯著死罪的，恁呣通收贖回生命的價錢；的確著互伊死。

32

彼個走到逃閃的城的人，恁呣通給伊提贖回的價，互伊佇祭司未死的代先閣來踮本地。

33

按呢，恁就無拍垃墋恁所徛起的地，因為血是拍垃墋地的；若有血流佇地裡，設使呣是流彼個人者的血，彼個地就得著清氣。

34

恁呣通拍垃墋恁所踮的地，就是我踮佇彼中間的地，因為我──耶和華踮佇以色列人的中間。」