馬太福音 第 8 章 - 台語漢字羅馬本

1

耶穌已經落山，歸大陣的人隨伊。

2

抵當有一個癩的就近來拜伊，講：「主啊，你若肯，就會互我清氣。」

3

伊就伸手摸伊，講：「我肯，你通清氣！」伊的癩連鞭清氣。

4

耶穌閣給伊講：「謹慎莫得給人講，獨獨去，將本身互祭司驗，亦著獻摩西所吩咐的禮物，來做證據佇人。」

5

已經入迦百農，有百總就近伊，來求伊講：

6

「主啊，我的奴僕半　，倒佇厝內艱苦到極。」

7

伊就給伊講：「我來去醫伊。」

8

百總應講：「主啊，你到我兜，我當起；你干單講一句話，我的奴僕就會好。

9

因為我亦是互人管的人，也有兵互我管；給此個講：『去！』伊就去；給彼個講：『來！』伊就來；給我的奴僕講：『行按呢！』伊就行按呢。」

10

耶穌聽見就奇怪，給隨伊的人講：「我實在給恁講，親像此號的深信，連以色列中，我未曾抵著。

11

我閣給恁講，對東對西，有多多人欲到，及亞伯拉罕、以撒、雅各坐桌佇天國；

12

若是國的子民欲抵著趕出佇外面的黑暗，佇遐欲有啼哭咬牙切齒。」

13

耶穌就給百總講：「去啊！照你的信給你成。」抵抵彼時，伊的奴僕就好。

14

耶穌入彼得的家，看見伊的丈姆患著熱病倒。

15

就摸伊的手，熱就退；婦仁人就起來伺候伊。

16

到黃昏暗，有人導多多患著鬼者就近伊，伊用一句話趕出許個神，閣醫好一切有病的人。

17

就是欲應驗先知以賽亞所講的，講：伊本身替受咱的軟弱，擔當咱的病症。

18

耶穌看見歸大陣的人圍伊，就吩咐過去彼旁岸。

19

有一個經學士來，給伊講：「先生啊，你無論叨落去，我欲隨你。」

20

耶穌就給伊講：「狐狸有孔，天中的飛鳥有巢，獨獨人子無靠頭殼的所在。」

21

閣一個學生給伊講：「主啊，互我先倒去埋葬我的老父。」

22

獨獨耶穌給伊講：「你隨我；出在死人去埋葬的死人！」

23

已經落船，伊的學生隨伊。

24

忽然海裡起大風湧，致到船互湧蓋；若是耶穌睏。

25

學生就近來叫伊起來，講：「主啊，救哦，欲無命啦！」

26

伊就給講：「小信的人啊，怎樣許無膽？」就起來，責備風及海，就大平定。

27

許個人奇怪，講：「此個是甚麼號人？風及海亦順伊！」

28

已經過去彼旁岸，到加大拉人的地，有患著鬼者，二人，對塚墓出來抵著伊，勢面雄介介，致到無人敢對彼條路過。

29

忽然喉叫講：「上帝的子啊，阮及你有甚麼干涉？時未到，你來遮是欲苦楚阮嗎？」

30

離遠遠，有大群的豬討食。

31

許個鬼求伊，講：「你若趕阮，就差阮入豬群！」

32

伊就給講：「去啊！」鬼就出來，去入豬。忽然全群落山崁，入海死佇水裡。

33

顧豬者走去入城；將諸個事以及患著鬼的人所抵著的攏給人講。

34

通城的人出去尋著耶穌，已經見著，就求伊離開的地界。