馬太福音 第 2 章 - 台語漢字羅馬本

1

當希律王的時，耶穌已經出世佇猶太的伯利恆。有幾若個博士對東方來到耶路撒冷，講：

2

「出世做猶太人的王的佇叨落？因為阮佇東方有看見伊的星，才來欲拜伊。」

3

希律王聽見，就迫腹；通耶路撒冷亦是按呢。

4

就聚集眾祭司頭及百姓間的經學士，問：「基督著佇甚麼所在出世？」

5

給伊講：「佇猶太的伯利恆。因為先知有記載，講：

6

猶太地伯利恆啊，佇猶太諸個頭人中你攏呣是第一細的；因為欲有一個人君對你出，來照顧我的百姓以色列。」

7

對按呢，希律暗靜召博士，對詳細查彼個星出現的時，

8

就差去伯利恆，講：「恁去詳細探聽彼個嬰仔的事，尋著就來給我講，互我也通去拜伊。」

9

聽王的話就去。忽然東方所看見的星做頭導，到嬰仔的所在，就歇佇彼頂面。

10

看見彼個星，歡喜到顧得；

11

入厝，看見嬰仔及伊的老母馬利亞，就仆落拜嬰仔，開的寶盒，獻禮物互伊，就是黃金、乳香、沒藥。

12

閣佇眠夢中得著指點，教呣通倒轉去就近希律，就對別條路倒去本所在。

13

倒去了，有主的天使佇約瑟眠夢中出現，講：「起來！導嬰仔及伊的老母走去埃及，住遐，到我給你講；因為希律欲尋嬰仔來滅伊。」

14

伊就起來，透暝導嬰仔及伊的老母去埃及，

15

住遐到希律死。是欲應驗主託先知所講的，講：「我曾召我的子出埃及。」

16

彼時希律知互博士設去，就大受氣，差人將伯利恆及周圍所有的查甫囝仔，照伊對博士詳細查的時，凡若二歲以下的一盡。

17

按呢應驗早託先知耶利米所講的，講：

18

佇拉瑪聽見聲，啼哭閣大傷悲，拉結哭伊的子兒，呣願受安慰，因為無去。

19

希律已經死，主的天使佇埃及佇約瑟眠夢中出現講：

20

「起來！導嬰仔及伊的老母去以色列地；因為許個愛害嬰仔的生命者已經死啦！」

21

伊就起來，導嬰仔及伊的老母到以色列地；

22

總是聽見亞基老續接伊的老父希律佇猶太做王，就呣敢去遐，既然佇眠夢中得著指點，就退去加利利的境內，

23

到一個城，名拿撒勒，遐徛起。是欲應驗早託諸個先知所講的講，伊欲叫做拿撒勒人。