馬可福音 第 11 章 - 台語漢字羅馬本

1

行近耶路撒冷，到橄欖山邊的伯法其及伯大尼的時；耶穌差二個學生，

2

給講：「恁去對面的鄉社，已經入去就欲抵著一隻驢仔縛佇遐，猶未曾有人騎的；解開，給伊牽來。

3

若有人問恁講：『啥事做按呢？』恁就著講：『主欠用伊。』連鞭欲互伊倒來遮。」

4

二人就去，抵著一隻驢仔佇路裡的越角，縛佇門外，就解伊。

5

邊頭徛的人，有的講：「恁解驢仔欲啥事？」

6

照耶穌所講的給講，許個人就放互伊去。

7

就牽驢仔就近耶穌，續用家己的衫披佇彼頂面，耶穌就騎伊。

8

有多多人用的衫舖佇路裡，也有的用樹枝就是對園裡所剉來的。

9

前行後隨的叫講：和散那！佇主的名來的應該得著謳咾！

10

彼個欲來的國，就是咱的祖公大衛的國，應該得著謳咾啊！佇至高的位啊，和散那！

11

耶穌入耶路撒冷，入殿堂，四界看逐項的物。日已經暗，就及十二個學生出去，到伯大尼。

12

隔日，對伯大尼出來，耶穌枵。

13

遠遠看見一欉無花果樹有葉，就去看佇彼頂面有所得著無。已經到，竟然無所得著，只有葉若定，因為呣是無花果的時。

14

就對彼欉樹講：「今了後，永永無人食著你的果子。」伊的學生也聽見。

15

到耶路撒冷。耶穌入殿，就趕出殿內買賣的人，捙倒換錢的人的桌及賣鴿仔的人的椅；

16

續呣准人帶器具對殿裡經過；

17

閣教示講：「豈無記載講：我的厝欲稱做萬邦祈禱的厝嗎？若是恁互伊做賊巢。」

18

諸個祭司頭及經學士聽見，就尋看通怎樣來滅伊，因為驚伊，是眾人攏奇怪伊的教示。

19

逐下昏，耶穌出城去。

20

早起時，對遐經過，就看見彼欉無花果樹根枝攏枯焦去。

21

彼得記得，就給伊講：「拉比，你看！你所咒詛的無花果樹已經乾去。」

22

耶穌應講：「恁著信上帝。

23

我實在給恁講，凡若給此個山講：『徙去，佇海裡！』心內無僥疑，獨獨信伊所講的的確成，就欲給伊成。

24

所以我給恁講，見若恁所祈禱來求的，著信是已經得著，就欲給恁成。

25

見若恁徛祈禱的時，想著有人得罪你甚麼，就著赦免伊，互恁佇天裡的父也赦免恁的過失。」

26

｛恁若不饒恕人，恁佇天裡的父也不饒恕恁的過犯。〔台語羅馬譯本無此節！〕｝

27

閣到耶路撒冷。耶穌佇殿內行的時，許個祭司頭經學士及長老就近伊，講：

28

「你用甚麼權行諸個事？閣是誰互你此個權通行伊啊？」

29

耶穌就給講：「我也問恁一句話，恁若應我，我才欲給恁講我用甚麼權行諸個事。

30

約翰的洗禮是對天？抑是對人啊？恁著應我。」

31

相及議論講：「若講『對天』，伊欲講：『按呢，恁啥事呣信伊？』

32

若講『對人』，就驚百姓，因為眾人實在掠約翰做先知。」

33

就應耶穌講：「阮呣知。」耶穌就給講：「我也無欲給恁講我是用甚麼權行諸個事。」