路加福音 第 8 章 - 台語漢字羅馬本

1

過無幾日，耶穌四界行逐個城逐個鄉社，宣傳來報揚上帝國的福音。十二個學生也及伊去，

2

也有幾若個婦仁人，有的曾患著鬼，有的有破病今已經得著醫好，其中有抹大拉的馬利亞（曾有七個鬼對伊出去），

3

閣有希律的管家苦撒的某約亞拿，閣有蘇撒拿，以外猶有多多婦仁人，攏用所有的來服事。

4

有多多人聚集，閣有人對逐個城來就近伊，彼時耶穌設譬喻給講：

5

「有撒種的出去撒種。撒的時，有的磕落佇路邊，互人所踏，天中的飛鳥一盡食伊。

6

有的磕落佇石盤頂，發起來就乾去，因為無潤澤。

7

有的磕落佇茦仔中，茦仔平平發起來，遮蔽伊。

8

有的磕落佇好的土地，發起來結實到一百倍。」諸個話講了，就叫講：「有耳孔通聽的，著聽！」

9

伊的學生問伊，此個譬喻怎樣。

10

耶穌講：「上帝國的奧妙互恁知；若是對別人，就用譬喻，欲互看，看見，聽也曉悟。」

11

「此個譬喻就是按呢：種子就是上帝的道理。

12

佇路邊的，就是人聽見道理，魔鬼就來，對的心內將道理搶去，免得信來得著救。

13

佇石磐頂的，就是人聽了歡喜承受道理，若是無根，是暫時信若定，抵著試煉的時就悖謬。

14

落佇茦仔內的，諸個就是人聽了就去，互在生的掛慮、貨財、宴樂所遮蔽，就結呣成粒。

15

佇好土地的，諸個就是人用好閣善良的心聽道理來執守伊，閣吞來結實。」

16

「無人點燈用器具來蓋伊，抑是下佇眠床下，就是下佇燈台頂，互入來的人看見彼個光。

17

因為無有隱密也將來無露現的；無有秘密將來無互人知閣露現的。

18

所以，恁著謹慎怎樣來聽；因為見若有的，欲互伊；無的，連伊家己掠做有的，也欲給伊搶去。」

19

耶穌的老母及兄弟來就近伊，因為人多，得近倚。

20

有人給伊講：「你的老母及你的兄弟徛佇外面，愛欲看你。」

21

伊應講：「我的老母及我的兄弟，就是諸個聽上帝的道理來行的人。」

22

有一日，耶穌及伊的學生上船，給講：「咱來去湖的彼旁岸。」就開船。

23

行的時，耶穌睏去。有颶頭風拍落來湖裡，船內的水差不多滿，盡在危險。

24

學生近倚叫伊醒，講：「先生啊！先生啊！欲無命啦！」伊就醒，責備風及海湧；風湧就息，也平定。

25

伊就給學生講：「恁的信佇叨落？」就驚惶奇怪，相及講：「這是甚麼人？命令風及水，也順伊？」

26

船到格拉森人的地方，就是加利利的對面。

27

耶穌離開船上岸，有一人對城裡出來抵著伊，是患著鬼的。久久無穿衫，無厝內，獨獨佇墳墓中。

28

看見耶穌就喉叫，仆佇伊的面前，大聲講：「至高上帝的子耶穌，我及你有甚麼干涉？求你莫得苦楚我！」

29

因為耶穌有命令邪神對彼個人出來。因為邪神常常掠伊；人用鐵鍊鍊伊，用腳銬銬伊，來顧守伊，伊就掇斷所縛伊的器具，伊互鬼趕到曠野。

30

耶穌問伊講；「你叫甚麼名？」伊講：「營」；因為有多多鬼入伊。

31

鬼求耶穌，莫得吩咐入深淵。

32

佇遐有歸陣豬佇山裡討食。鬼求伊，准入許個豬。就准，

33

鬼就對彼人出去，入許個豬。歸陣豬就走落山坪，落湖激死。

34

顧豬的看見此個代誌就走去，報城內及鄉社的人知。

35

就出來愛看此個代誌；就近耶穌，抵著鬼所對伊出來彼人，穿衫，嗐哉，坐佇耶穌腳下，就驚。

36

看見的人將患著鬼的人怎樣得著救報知。

37

格拉森四方的人，攏求耶穌離開，因為大驚的緣故；伊就上船倒轉去。

38

鬼所對伊出去的人求欲及伊去，若是耶穌差伊去，講：

39

「倒去恁兜，將上帝為著你行許大的事排列互人知。」伊就去，遍城宣傳耶穌為著伊所行許大的事。

40

耶穌倒轉來的時，眾人接納伊，因為攏聽候伊。

41

有一人名叫睚魯，就是管會堂的，來仆佇耶穌的腳下，

42

求伊到伊的家；因為伊有孤生的查某子，約略十二歲，欲死。耶穌去的時，眾人挨夾伊。

43

有一個婦仁人，血漏十二年，因為請醫生家伙破到了，無一人會醫好伊。

44

來到耶穌的尻脊後，摸伊衫仔裾的鬚，血漏即時止。

45

耶穌講：「摸我的是是誰？」大家講無。彼得及同行的人講：「先生，眾人迫倚夾著你。」

46

耶穌講：「有人摸我，因為我知有權能對我出。」

47

婦仁人看伊囥密，愕愕惙來仆佇伊腳下，當眾人的面前講明摸伊的緣故，及伊怎樣連鞭好。

48

耶穌給伊講：「婦仁人啊，你的信有救你；做你安心倒去！」

49

伊猶講的時，有人對管會堂者的家來，講：「你的查某子已經死，免勞動先生。」

50

耶穌聽見就應伊講：「呣免驚，只有著信，伊就得著救。」

51

已經到伊的家，佇彼得、約翰、雅各，及查某囝仔的父母以外，呣准別人及伊入去。

52

眾人啼哭，為著伊來搥胸。耶穌講：「莫得啼哭！因為伊呣是死，是睏若定。」

53

就恥笑伊，因為知伊已經死啦。

54

耶穌牽查某囝仔的手，叫講：「查某囝仔，起來！」

55

伊的神復倒，即時起來。耶穌吩咐互伊食。

56

伊的父母卬愕；耶穌命令，莫得將所行的給人講。