路加福音 第 2 章 - 台語漢字羅馬本

1

當彼時，該撒亞古士督有出詔，命令天下攏造家甲。

2

這頭一擺的家甲，是居里扭做敘利亞總督的時來做的。

3

眾人去造家甲，逐人倒去本城。

4

約瑟的世系屬佇大衛的家，所以對加利利的拿撒勒城上去猶太，到大衛的城，名叫伯利恆的，

5

欲及伊所聘定的馬利亞相及造家甲。彼時馬利亞已經有娠孕。

6

In佇遐的時生產的期到，

7

就生頭上子，用布包伊，互伊睏佇槽裡，因為客館無所在通容允In。

8

彼地方有顧羊的住佇山裡，暝時守更顧In的羊群。

9

主的天使徛佇In的身邊，主的榮光圍纍照In；顧羊的大驚。

10

天使給In講：「莫得驚！因為我報恁大歡喜的好消息，互百姓攏有份；

11

因為今仔日佇大衛的城，已經為著恁生一個拯救者，就是主基督。

12

恁欲看見一個嬰仔，用布包，睏佇槽裡的，此個就是互恁做記號。」

13

忽然，有多多天兵及彼個天使相及佇teh謳咾上帝講：

14

佇極高的位榮光歸佇上帝！地上和平佇伊所歡喜的人的中間！

15

諸個天使離開In，上天的時，顧羊的相及講：「今咱來去伯利恆，看所成的事，就是主所報咱知的。」

16

就緊緊去，尋著馬利亞及約瑟，閣看見嬰仔睏佇槽裡；

17

看了，就將天使所對In講此個嬰仔的事報人知。

18

聽見的人攏奇怪顧羊的所對In講的事。

19

獨獨馬利亞將諸個話記住住，心內常常teh想。

20

顧羊的倒去，為著所聽見的所看見的，就是天使所對In講的，來歸榮光謳咾上帝。

21

到第八日，給嬰仔行割禮的期，就號伊的名叫耶穌；就是伊未投胎的時，天使所號的。

22

照摩西的律例，清氣的日已經滿，就抱嬰仔上耶路撒冷，欲獻互主。（

23

照主的律例所記載講：「見若頭上的查甫子欲稱做聖歸佇主；」）

24

也欲獻祭，照主的律例所講，用一對的鳩鵻，抑是二隻鴿仔子。

25

抵當佇耶路撒冷有一人，名叫西面；此人義閣敬虔，平時欣慕彼個安慰以色列的，聖神佇伊。

26

伊曾得著聖神指示，知伊猶未死欲代先看見主的基督。

27

伊互聖神感動，就入殿，抵仔耶穌的父母抱嬰仔入來，欲給伊照律法的例來行。

28

彼時西面用手接嬰仔，謳咾上帝講：

29

主啊！今照你的話，解放你的奴僕安然過世；

30

因為我的目睭已經看見你的拯救

31

--就是你所備辦佇萬百姓的面前的：

32

做光來照外邦，閣做你以色列百姓的榮光。

33

伊的父及伊的母奇怪所論嬰仔的話。

34

西面給祝福，閣對伊的老母馬利亞講：「此個嬰仔受設立，欲互以色列中多多人跋倒，多多人起來；也做受辯駁的記號，

35

閣你家己的心也欲有劍鑿透過，互多多人心內的念頭會露出。」

36

閣有亞設的支派，法內力的查某子亞拿，伊是做先知，年歲已經老，對在室女的時，嫁互丈夫七年久，

37

就守寡八十四年，攏無離開殿，禁食祈禱，暝日服事。

38

抵抵彼時，伊進前稱謝上帝，對見若欣慕耶路撒冷得著贖回的人講起此個嬰仔的事。

39

照主的律法行逐項代誌明白，倒去加利利，到本城拿撒勒。

40

嬰仔漸漸大，日日勇壯，智慧充滿，上帝的恩典及伊佇。

41

逐年過節的時，伊的父母去耶路撒冷。

42

到伊十二歲的時，照節期的例攏上耶路撒冷。

43

節期已經明白，倒去的時，囝仔耶穌猶住佇耶路撒冷。伊的父母呣知，

44

拍算伊佇同行的人的中間，行一日的路站，才佇親戚及相識的人的中間尋伊，

45

尋無著，就倒轉去耶路撒冷尋伊。

46

三日後，尋著伊佇殿裡，坐佇許個先生的中間，也聽，也問。

47

聽伊的人，攏奇怪伊的聰明及伊的應答。

48

父母看見伊就卬愕。伊的老母對伊講：「子啊！你啥事按呢款待阮？你看，你的父及我傷心尋你！」

49

伊給講：「啥事尋我？豈呣知我應該佇我的父的厝嗎？」

50

曉得，伊所給講的話。

51

耶穌就及落去，到拿撒勒，來承順。伊的老母將諸個話攏記佇心裡。

52

耶穌的智慧及年歲愈加添，上帝及人愈疼伊。