利未記 第 7 章 - 台語漢字羅馬本

1

「補過失的祭的規例就是按呢：此個是至聖的。

2

佇燒祭的所在，也著佇遐補過失的祭；伊的血，著灑佇壇裡的四圍。

3

伊的油著攏獻彼個肥的尾及蓋臟腑的油，

4

二粒腰子及所有的油，就是倚近腰雙旁的油，及肝裡的網紗及腰子，一概提起來。

5

祭司著佇壇頂燒伊，做獻互耶和華的火祭，是補過失的祭。

6

祭司中的查甫丁攏著食伊；佇聖的所在食，這是至聖的。

7

贖罪祭甚麼款，補過失的祭也是按呢，的規例是一樣。用彼個來贖罪的祭司就得著此個物。

8

祭司給人獻燒祭，就伊所獻燒祭的精牲的皮歸佇祭司本身。

9

見若佇火爐的素祭及佇鼎仔，佇煎盤備辦的，攏著歸佇獻彼個祭的祭司。

10

見若素祭，無論是參油的抑是乾的，攏著歸亞倫的子孫，大家平分。」

11

「人獻謝恩祭互耶和華彼個規例就是按呢：

12

伊若為著感謝來獻，就著用調和油的無酵餅及抹油無酵的薄餅，以及摶互伊齊的麵粉用油調和做的餅，及感謝的祭相及來獻。

13

著用有酵的餅，及為著感謝來獻的謝恩祭，及伊的禮物相及來獻。

14

著對逐項禮物的中間，提一項獻互耶和華做舉祭，這著歸佇灑謝恩祭的血的祭司。

15

為著感謝來獻的謝恩祭的肉，著佇獻禮物的日食伊，一點仔呣通留到天光。

16

若伊所獻的禮物是為著謝願，抑是甘心獻的，著佇伊獻祭的日食伊，所剩的明仔日通食伊。

17

獨獨所剩的祭肉，到第三日著用火燒；

18

到第三日若食謝恩祭的肉，此個祭無得著接納，也無給獻的算額，反轉是做通厭惡的，食伊的人，就著擔當伊的罪。

19

「祭肉若磕著無清氣的物就呣通食，著用火燒。論到祭的肉，見若清氣的人攏通食伊；

20

獨獨屬佇耶和華謝恩祭的肉，人若身軀染著無清氣來食伊，此個人著對伊的百姓中剪除去。

21

有人摸著甚麼無清氣的物，或是人的無清氣，或是無清氣的精牲，或是無清氣可惡的物，來食著屬佇耶和華謝恩祭的肉，此個人著對伊的百姓中剪除去。」

22

耶和華吩咐摩西講：

23

「你著吩咐以色列人講：無論是牛，抑是綿羊，抑是山羊的油，恁攏呣通食伊。

24

家己死者的油及互野獸拆者的油，通做別物的路用，獨獨恁千萬呣通食。

25

會通獻互耶和華做火祭的精牲的油，見若食伊的人，彼個人著對伊的百姓中剪除去。

26

佇恁一切所徛起的所在，無論是鳥抑是野獸的血，恁攏呣通食伊。

27

無論甚麼人食甚麼血，彼人著對伊的百姓中剪除去。」

28

耶和華吩咐摩西講：

29

「你著吩咐以色列人講：見若獻謝恩祭互耶和華的，著對伊的謝恩祭中帶伊的禮物來互耶和華。

30

伊著親手帶獻互耶和華的火祭來，就是帶油及胸來，通用胸佇耶和華的面前做搖祭，來搖伊。

31

祭司著將油燒佇壇頂，獨獨胸著歸佇亞倫及伊的子孫。

32

恁著對恁謝恩祭將正腿做舉祭，歸互祭司。

33

亞倫的子孫中，獻謝恩祭的血及油的，著得著此個正腿做的份額；

34

因為我對以色列人謝恩祭的中間，取此個搖的胸及舉起的腿互祭司亞倫及伊的子孫，做對以色列人所永遠得著的份額。」

35

這是對耶和華火祭中，提出做亞倫受抹油的份額及伊的子孫受抹油的份額，佇伊導來當祭司的職服事耶和華的日，

36

就是伊給抹油的日，耶和華吩咐以色列人供給的。做逐世代永遠得著的份額。

37

這是燒祭、素祭、贖罪祭、補過失的祭、設立聖職的祭，及謝恩祭的規例，

38

攏是耶和華佇西奈山所命令摩西的，就是伊佇西奈曠野命令以色列人獻禮物互耶和華的日。