利未記 第 3 章 - 台語漢字羅馬本

1

「伊的禮物若是謝恩的祭，或是對牛群中獻，無論是公的、是母的，著用無瑕疵的獻佇耶和華的面前。

2

伊著按手佇禮物的頭殼頂，伊佇會幕的門口。亞倫子孫做祭司者，著用血灑佇壇的周圍。

3

對謝恩祭的中間，著將火祭獻互耶和華，用蓋臟腑的油及臟腑所有的油，

4

以及二粒腰子及所有的油，就是倚近腰雙旁的油，及肝裡的網紗及腰子，一概提起來。

5

亞倫的子孫著燒伊佇壇裡燒祭的頂面，就是佇火裡的柴，是獻互耶和華做芳芳的火祭。

6

「伊的禮物做謝恩的祭獻互耶和華的，若是對羊群中，或是公的或是母的，著用無瑕疵的。

7

若獻一隻羊仔子做禮物，著佇耶和華的面前獻，

8

也著按手佇伊的禮物的頭殼頂，伊佇會幕前。亞倫的子孫著將伊的血灑佇壇的周圍。

9

對謝恩祭的中間，著將火祭獻互耶和華，彼中間的油及伊全牲肢肥的羊尾對倚近脊骨的所在提起來，以及蓋臟腑的油及臟腑所有的油，

10

以及二粒腰子及所有的油，就是倚近腰雙旁的油，及肝裡的網紗及腰子，一概提起來。

11

祭司著燒伊佇壇頂，是獻互耶和華做火祭的食物。

12

「伊的禮物若是山羊，著佇耶和華的面前獻。

13

著按手佇伊的頭殼，伊佇會幕前。亞倫的子孫著將血灑佇壇的周圍，

14

伊著對這獻伊的禮物做火祭互耶和華，

15

用蓋臟腑的油及臟腑所有的油，以及二粒腰子及所有的油，就是倚近腰雙旁的油，及肝頂的網紗及腰子，一概提起來。

16

祭司著燒伊佇壇頂，做火祭的食物，取伊的芳芳的。油攏是耶和華的。

17

佇恁一切徛起的所在，油及血攏呣通食；這欲做恁逐世代永遠定著的例。」