士師記 第 20 章 - 台語漢字羅馬本

1

對按呢以色列眾人對但，到別是巴攏出來，及踮佇基列的人，全會聚集親像一人，佇米斯巴到耶和華的面前。

2

百姓的首領，及以色列眾支派，攏家己來徛佇上帝百姓的會中；抬刀的步兵共四十萬。

3

便雅憫人攏聽見以色列人上到米斯巴。以色列人就講：「此個歹代的情由著給阮講明。」

4

彼個利未人，就是受害死的婦仁人的丈夫，應講：「我及我的細姨到便雅憫的基比亞歇暝。

5

基比亞人起來攻擊我，暝時包圍我歇的厝，想欲害死我，閣強姦我的細姨致到死。

6

我就將我的細姨割歸塊，差人提到以色列得著做業的全地，因為佇以色列中行淫亂及見誚事。

7

恁攏總以色列人著打算議論。」

8

眾百姓攏起來親像一人，講：「阮無一人欲去伊的布棚，也無一人欲倒去伊的厝。

9

阮對基比亞人欲按呢行，照所抽的籤去攻擊伊。

10

阮欲佇以色列眾支派中，一百人取十人，一千取一百，一萬取一千，給百姓運糧，互到便雅憫的基比亞的時，通照佇以色列中所行見誚的事來行佇。」

11

對按呢以色列眾人聚集攻擊彼個城，大家聯合親像一人。

12

以色列諸個支派差人，遍遍給便雅憫的支派講：「恁中間所行的甚麼歹啊？

13

今恁著將許個人就是基比亞的匪類交出，阮通互死，對以色列中除去彼個歹。」總是便雅憫人呣肯聽兄弟以色列人的話。

14

便雅憫人對許個城出來，聚集到基比亞，欲及以色列人交戰。

15

彼時便雅憫人對逐個城點出抬刀的，共二萬六千；另外猶有基比亞人點出七百精練的兵。

16

佇眾百姓的中間有七百精鍊的兵，慣練用倒手的，逐個會用索甩石，準準分毫無差。

17

便雅憫人以外，點出以色列人抬刀的，共四十萬，攏是戰士。

18

以色列人就起來，到伯特利問上帝講：「阮中間是誰著代先上去及便雅憫人交戰啊？」耶和華講：「猶大著代先去。」

19

以色列透早起來，紮營攻擊基比亞。

20

以色列人就出來，欲及便雅憫人交戰，以色列人排陣佇基比亞欲攻擊。

21

便雅憫人就對基比亞出來，彼日死以色列人二萬二千倒佇地裡。

22

以色列人就家己奮勇，猶原佇頭一日排陣的所在閣排陣。

23

以色列人上去，佇耶和華的面前啼哭，到下昏，問耶和華講：「阮著閣上去及阮的兄弟便雅憫人交戰抑呣免？」耶和華講：「著上去攻擊伊。」

24

第二日，以色列人就進前去攻擊便雅憫人。

25

便雅憫人也佇第二日對基比亞出來，攻擊，閣死以色列人一萬八千人倒佇地裡，攏是抬刀的。

26

以色列人及眾百姓攏上去到伯特利，佇遐坐佇耶和華的面前啼哭，彼日禁食到日暗；閣佇耶和華的面前獻燒祭及平安祭。

27

彼時，上帝的約櫃佇遐；亞倫的孫、以利亞撒的子非尼哈彼時徛佇伊的面前。

28

以色列人問耶和華講：「我著出去及我的兄弟便雅憫人交戰嗎？抑是著息啊？」耶和華講：「你著上去，因為明仔日我欲將交佇你的手。」

29

以色列人就埋伏兵佇基比亞的四圍。

30

第三日，以色列人閣上去攻擊便雅憫人，排列隊伍佇基比亞，及前二擺一樣。

31

便雅憫人就出去抵敵百姓，就受引誘離開城；親像前二擺，佇田裡起手死以色列人約略三十個；佇大路頂許個條路，一條伯特利，一條基比亞。

32

便雅憫人講：「猶原輸佇咱的面前。」以色列人講：「咱著逃走，引誘離開城到大路。」

33

以色列眾人攏對伊的所在起來，排列隊伍佇巴力他瑪，以色列埋伏的兵對的所在就是馬利迦巴衝出來。

34

通以色列有一萬精練的兵，進前來攻擊基比亞，交戰的勢面真猛烈；總是便雅憫人呣知災禍到啦。

35

耶和華拍便雅憫佇以色列的面前。彼日，以色列人死便雅憫二萬五千一百人，攏是抬刀的。

36

便雅憫人才知的受拍。因為以色列人退讓便雅憫人，是為著倚靠所設佇基比亞的伏兵。

37

埋伏的兵緊緊竄入基比亞，埋伏的兵進前用刀死通城的人。

38

以色列人及伏兵有代先約一個記號，就是互火熏對城內淐起來。

39

以色列人當交戰的時越轉身，便雅憫人起手死以色列人，約略三十個，就講：「猶原親像前擺輸佇咱的面前。」

40

當火焰親像煙柱對城中淐上去的時，便雅憫人越頭看，看見通城的火熏抵天。

41

以色列人閣越轉身，便雅憫人就真卬愕，因為看見災禍到啦。

42

所以佇以色列人的面前越轉身向曠野的路逃走；總是追真倚。對許個城出來的，攏佇彼中間。

43

圍困便雅憫人，追，佇歇腳的所在、睭踏，到基比亞的對面向日出的所在。

44

便雅憫人死的有一萬八千，諸個攏是勇士。

45

其餘的人越轉身走去曠野，到臨門的石磐。以色列人佇大路裡收拾五千人，親像拾麥屑一樣，閣追到基頓死二千人。

46

彼日便雅憫人死的共二萬五千人，許個攏是抬刀的勇士。

47

獨獨六百人，越轉身走去曠野，到臨門的石磐，就踮佇臨門的石磐四月日。

48

以色列人閣越轉攻擊便雅憫人，用刀拍死諸個城中的人及精牲，以及一切所抵著的，閣一切所到的城攏用火燒。