士師記 第 13 章 - 台語漢字羅馬本

1

以色列人閣行耶和華所看做歹的事，耶和華將交佇非利士人的手四十年。

2

彼時，有一個瑣拉人，是但的族，名叫瑪羅亞。伊的某無懷孕，無生。

3

耶和華的使者對彼個婦仁人顯現，給伊講：「你平素無懷孕，無生，今你欲懷孕生一個子。

4

所以你著細膩，薄酒厚酒攏呣通飲，無清氣的物也攏呣通食。

5

因為你懷孕欲生一個子，剃頭毛的刀呣通到伊的頭殼，因為此個囝仔對胎裡就歸上帝做拿細耳人。因為伊欲做救以色列的頭一站脫離非利士人的手。」

6

婦仁人來給伊的丈夫講：「有一個上帝的人到我遮，伊的容貌親像上帝使者的容貌，真通驚。我無問伊對叨落來，伊也無用伊的名給我講，

7

總是給我講：『你懷孕欲生一個子，所以薄酒厚酒攏呣通飲，無清氣的物也攏呣通食；因為此個囝仔對胎裡到伊死的日，欲歸上帝做拿細耳的人。』」

8

瑪羅亞就求耶和華講：「主啊，求你互你所差上帝的人閣來阮遮，通教示阮怎樣款待此個欲生的子。」

9

上帝聽瑪羅亞的話；婦仁人坐佇田裡的時，上帝的使者閣到伊遐，總是伊的丈夫瑪羅亞無及伊佇。

10

婦仁人趕緊走去報伊的丈夫給伊講：「彼日來我遮彼個人，閣對我出現。」

11

瑪羅亞起來隨伊的某到彼人遐，給伊講：「曾及此個婦仁人講話的是你嗎？」伊講：「是我。」

12

瑪羅亞講：「願你的話應驗！此個囝仔著照甚麼法，阮著對伊怎樣行？」

13

耶和華的使者對瑪羅亞講：「我給婦仁人所講一切的事，伊攏著斟酌。見若葡萄所出的伊呣通食，薄酒厚酒攏呣通飲，一切無清氣的物也呣通食。見我所命令的，伊攏著遵守。」

14

見若葡萄所出的伊呣通食，薄酒厚酒攏呣通飲，一切無清氣的物也呣通食。見我所命令的，伊攏著遵守。」

15

瑪羅亞對耶和華的使者講：「請你互我留，阮通給你備辦一隻山羊仔。」

16

耶和華的使者給瑪羅亞講：「你雖然留我，我呣食你的物，你若備辦燒祭就著獻互耶和華。」因為瑪羅亞呣知伊是耶和華的使者。

17

瑪羅亞給耶和華的使者講：「你名叫甚麼，到你的話應驗的時，阮通尊敬你。」

18

耶和華的使者給伊講：「你啥事問我的名，我的名是奇妙的。」

19

瑪羅亞將一隻山羊仔及素祭佇石磐頂來獻互耶和華，使者行奇怪的事；瑪羅亞及伊的某看見，

20

因為火焰對壇頂淐上天的時，耶和華的使者佇壇頂的火焰中也上去。瑪羅亞及伊的某看見，就仆佇地裡。

21

耶和華的使者無閣出現互瑪羅亞及伊的某看見，瑪羅亞才知伊是耶和華的使者。

22

瑪羅亞給伊的某講：「咱的確會死，因為咱有看見上帝。」

23

伊的某就給伊講：「耶和華若欲互咱死，的確無對咱的手接納燒祭及素祭，閣無將諸個一切的事指示咱，此霎也無將這事給咱講。」

24

後來婦仁人生一個子，給伊號名叫參孫。囝仔大漢，耶和華賜福伊。

25

佇瑪哈尼但，就是瑣拉及以實陶的中間，耶和華的神起頭感動伊。