約書亞記 第 14 章 - 台語漢字羅馬本

1

以色列人佇迦南地所得著的業，就是祭司以利亞撒及嫩的子約書亞，及以色列逐支派的族長所分互的，攏記佇下底，

2

是照耶和華託摩西所命令的，拈鬮分互九支派閣半支派。

3

因為摩西佇約但河彼旁已經分業互二個支派閣半支派，獨獨佇中間無分業互利未人。

4

因為約瑟的子孫是二支派，就是瑪拿西及以法蓮，總是無用地分互利未人做業，只有互城通徛起，及城的郊野，通做精牲及財物的路用。

5

以色列人照耶和華所命令摩西的去行，來分彼個地。

6

彼時，猶大人佇吉甲見約書亞，有基尼洗族耶孚尼的子迦勒給伊講：「早佇加低斯巴尼亞，耶和華對上帝的奴僕摩西所講，關係你我的代誌的，你攏知。

7

耶和華的奴僕摩西對加低斯巴尼亞差我偷看此個地，彼時我抵仔四十歲；我盡我的心回覆伊。

8

總是，及我上去許個兄弟互百姓心失志；獨獨我全心隨耶和華──我的上帝。

9

當日摩西咒誓講：『你的腳所踏的地定著欲歸你及你的子孫永遠做業，因為你全心跟隨耶和華──我的上帝。』

10

看啊，耶和華照伊所講的，互我活已經四十五年；就是對以色列人行佇曠野，耶和華給摩西講這話的時。看啊，現今我八十五歲啦，

11

我猶久勇健，親像摩西差我去彼日一樣；無論是爭戰，是出入，我的氣力彼時怎樣，現在我的氣力也是按呢。

12

求你用耶和華彼日所講的山地互我；因為彼日你也有聽見，佇遐有亞衲族的人，伊的城闊大堅固。若耶和華及我佇，我就欲趕出，照耶和華所講的。」

13

約書亞就給伊祝福，用希伯崙互耶孚尼的子迦勒做業。

14

所以希伯崙做基尼洗族耶孚尼的子迦勒的產業，直到今仔日，因為伊全心跟隨耶和華──以色列的上帝。

15

希伯崙前叫基列亞巴；此個亞巴是亞衲族中第一大的人。對按呢國內太平，無閣交戰。