以賽亞書 第 62 章 - 台語漢字羅馬本

1

我因為錫安的緣故的確無靜靜，因為耶路撒冷的緣故的確無歇睏，直到伊的公義親像光發出，伊的拯救親像燈。

2

列國欲看你的公義；列王欲看你的榮光。你欲得著稱呼新的名，就是耶和華親嘴所稱呼者。

3

你欲佇耶和華的手中做娞的王帽，佇你的上帝的手掌做冕旒。

4

你無閣稱做「受棄拺者」；你的地也無閣稱做「拋荒者」。你欲稱做我「所歡喜者」；你的地也欲稱做「有丈夫者」。因為耶和華歡喜你，你的地也欲做有丈夫者。

5

因為親像少年人娶在室女，你的百姓也欲按呢娶你；親像新子婿歡喜新娘，你的上帝也欲按呢歡喜你。

6

耶路撒冷啊，我佇你的城頂設立守望的，通日通暝無靜靜。懇求耶和華的，恁呣通歇睏，

7

也呣通互伊歇睏，直到伊建立耶路撒冷，互耶路撒冷佇地上成做通謳咾者。

8

耶和華指家己的正手及大權能的手骨咒誓講：我的確無閣將你的五穀互你的對敵做食物；外邦人也無閣飲你所著磨來得著的新酒。

9

獨獨許個收割者欲食伊，來謳咾耶和華；許個收拾者的欲佇我聖所的院內飲伊。

10

恁著對城門經過，備辦百姓的路；填高填高大路，除去石頭，為著列國　大旗。

11

看啊，耶和華曾傳報到地極，恁著給錫安的百姓講：看啊，你的拯救來啦。看啊，伊的賞賜佇伊遐；伊的報答佇伊的面前。

12

人欲稱做「聖的百姓」，「耶和華所贖回者」；你也欲稱做「尋著者、無受放拺的城」。