以賽亞書 第 55 章 - 台語漢字羅馬本

1

呃，見若恁嘴乾的著來就近水；也無錢的恁著來。來買來食；來啊，呣免銀，呣免價錢，來買酒及奶。

2

恁啥事開費錢買彼個食得的物？啥事著磨佇彼個互人食飽的啊？恁著留心聽我就會食彼個好物，得著享受油膩，互心歡喜。

3

恁著俯耳孔就近我；著聽，就恁的心神會活。我欲及恁立永遠的約，就是所應允大衛堅固的恩惠。

4

看啊，我已經設立伊做列邦的干證，做列邦的君王及首領。

5

看啊，你平素呣識的百姓，你欲叫伊來；平素呣識你的百姓亦欲走來倚你，攏是為著耶和華──你的上帝以色列的聖者，因為伊已經榮光你。

6

著趁耶和華通尋著的時來尋伊，佇伊相近的時求叫伊。

7

歹人著離開伊的路；不義的人著改換伊的念頭。歸向耶和華，伊欲憐憫伊；歸向咱的上帝，因為伊欲遍行赦免。

8

耶和華講：我的念頭呣是恁的念頭；恁的路呣是我的路。

9

因為天怎樣卡高地，按呢，我的路卡高恁的路；我的念頭卡高恁的念頭。

10

因為親像雨及雪對天降落，亦無閣倒轉，就是潤澤土地，互地上發芽結實，互撒種的有種子，互食的有米糧。

11

我的嘴所講出的話亦欲按呢，決斷無空空倒轉來我遮，是欲成我所歡喜的，欲互我所差伊做的事得著亨通。

12

恁出去欲歡歡喜喜，得著引導平平安安。大山小山欲佇恁的面前出聲唱歌；田野的樹木攏欲搭手。

13

松柏發生，來替草茦；岡拈樹發生，來替蒺藜。這是欲做耶和華的名的記念，做永遠的證據，會剪除。