以賽亞書 第 53 章 - 台語漢字羅馬本

1

咱所聽見的，有是誰信啊？耶和華的手向是誰顯明啊？

2

因為伊佇伊的面前生長親像茈茈的芛，亦親像根發佇乾地。伊無好形狀無威儀；咱看見伊亦無好形容，通互咱欣慕伊。

3

伊受看輕，互人放拺；受多多苦痛，常常抵著憂悶。伊受看輕，親像互人掩面呣看的一樣；咱亦無尊重伊。

4

伊實在擔當咱的憂悶，背咱的苦痛；總是咱掠做伊受責罰，互上帝拍，閣受苦楚。

5

若是伊為著咱的過失受傷，為著咱的罪過受害。伊擔當刑罰，咱得著平安；伊受鞭拍，咱得著醫好。

6

咱攏親像羊迷路；逐人行家己的偏路；耶和華互咱眾人的罪攏歸佇伊身上。

7

伊受壓迫抵著艱苦，猶久無開嘴；伊親像羊仔牽到受的地，閣親像羊佇剪毛的人的面前無出聲，伊亦按呢無開嘴。

8

伊對壓迫及審判，受取去，佇伊的世代，是誰想著伊對活人的地受剪除？抑是因為我的百姓的罪過受拍啊？

9

伊雖然無行強暴，嘴也無有詭詐，猶久佇伊的死及歹人同墓；也及富人相及。

10

總是耶和華歡喜損害伊，互伊受苦痛。伊的活命做贖罪的祭。彼時伊欲看見後裔，閣加添歲壽。耶和華所歡喜的事欲佇伊的手中亨通。

11

伊欲看見本身勞苦的效果，就心滿意足。我義的奴僕欲用伊的知識互多多人得著稱做義；也伊欲擔當的罪過。

12

所以，我欲互伊及坐高位者分份額，及強猛者分所搶的物。因為伊放拺生命到死；伊也列佇罪犯的中間。總是伊擔當多多人的罪，閣替罪犯祈禱。