以賽亞書 第 45 章 - 台語漢字羅馬本

1

我──耶和華所抹油的古列；我牽伊的正手，互列國降服佇伊的面前。我亦欲解列王的腰帶，互城門開佇伊的面前，閣諸個門的確無關。

2

我對伊按呢講：我欲行佇你的面前，修平嵁硈的地。我欲拍破銅的門，斬斷鐵的閂。

3

我欲將暗中的寶物及隱密的財寶賞賜你，互你知叫名召你者，就是我──耶和華、以色列的上帝。

4

因為我的奴僕雅各，我所揀以色列的緣故，我就叫名召你；你雖然呣識我，我有稱你的名。

5

我是耶和華，佇我以外無有別個；除我以外無有上帝。你雖然呣識我，我欲給你縖腰。

6

對日出亦對日落的所在，互人攏知除我以外，無有別個。我是耶和華；佇我以外無有別個。

7

我造光，亦創造暗；我造平安，亦創造災禍；諸個攏是我──耶和華所做的。

8

諸個天啊，對頂面來滴，穹蒼降落公義；地面裂開，生出救恩，互公義做一下發生；我--耶和華曾創造伊。

9

災禍啊，彼個及造伊的主計較者！伊不過是地上瓦片中的一塊瓦片。土豈通對摶伊者講：你做甚麼？抑是你所做的物豈通講：伊無手嗎？

10

災禍啊，彼個對老父講：你所生的是甚麼啊？抑是對老母講：你所育者是甚麼啊？

11

以色列的聖者，就是造伊的耶和華按呢講：將來的事，恁通問我；論到我諸個子，以及我的手所做的，恁通交代我。

12

我造地，亦創造人佇地上。我親手展開諸個天；天頂的萬象亦是我所命令的。

13

我照公義興起古列，閣欲修直伊一切的路。伊欲起造我的城，解放我受掠的百姓；呣是為著價錢，亦呣是為著報賞。這是萬軍的耶和華講的。

14

耶和華按呢講：埃及著磨得著的，古實的財利，及西巴的大漢人，攏欲歸你，屬你，隨你。欲掛鐵鍊來歸你，仆拜佇你的面前，求恁講：上帝真正佇恁中間，此個以外無別個；閣無別個上帝。

15

救主──以色列的上帝啊，你實在是家己隱密的上帝。

16

許個妝偶像的攏欲漏氣見誚，攏做一下見誚。

17

總是以色列欲得著耶和華用永遠的救恩，來救。恁的確無見誚，亦無漏氣，到永世代無息。

18

因為耶和華創造諸個天的，伊正是上帝，伊造地來做成伊；閣堅固伊，呣是空空造，是創造伊互人徛起。伊按呢講：我是耶和華，以外無別個。

19

我無佇隱密抑是佇黑暗地的位來講，我呣曾對雅各的後裔講：恁著空空尋我。我─-耶和華所講的是公義，所傳的是正直。

20

恁對列國逃脫的人，恁著做陣來相及倚來。許個扛雕刻偶像的柴、祈禱會救人的神明的，攏無智識。

21

恁著宣傳互伊進前來，互大家參詳。是誰對古早指明此個？是誰對早時宣傳此個？豈呣是我-─耶和華嗎？我以外，無閣有上帝；我是公義的上帝，閣是救主；我以外，無別個。

22

地極的人攏著仰望我，來得著救；因為我是上帝，無閣有別個。

23

我指家己來咒誓，我的嘴照公義講出此個話，決斷無收倒轉；萬腳頭窩欲向我來跪拜；萬嘴欲指我來咒誓。

24

有議論我講，公義、能力，獨獨在佇耶和華；人攏欲歸倚伊。凡若受氣伊的，的確見誚。

25

以色列的後裔攏欲因為耶和華得著稱做義，亦欲誇口。