以賽亞書 第 23 章 - 台語漢字羅馬本

1

論推羅的默示：他施的船仔，恁著哀哭；因為推羅已經拋荒啦，甚至無厝宅，也無出入。對基提的地方有報此個消息。

2

海墘徛起的百姓啊，早時西頓的生理人過海互恁得著昌盛，今恁著靜靜無話。

3

佇大水的頂面，西曷的米糧，尼羅河的五穀是推羅所進入的；伊做列國的埠頭。

4

西頓啊，你著見誚；因為大海講，就是海墘的衛所講：我無懷孕，也無有生子，無有養飼查甫子，也無有撫養在室女。

5

此個風聲傳到埃及；欲為著推羅的風聲極其痛疼。

6

恁著過去他施；海墘徛起的百姓啊，恁著哀哭。

7

這是恁快樂的城嗎？伊的頂世代就是對古早以來，伊的腳曾徙伊到遠遠徛起。

8

是誰定著此個意思攻擊推羅啊？伊本是發出冕旒的。伊的生理人是王親：伊的買賣的是世上的貴族。

9

萬軍的耶和華定著伊！欲凌辱一切榮光的驕傲，互世上一切的貴族抵著看輕。

10

他施的百姓啊，你著遍行你的地方，親像尼羅河；無閣有拘束。

11

伊已經伸伊的手佇海裡，互列國振動。論到迦南，耶和華曾吩咐著毀壞伊的衛所。

12

伊講：你受凌辱的在室女，西頓的查某子啊，你的確無閣得著快樂啦。起來！過去基提；就佇遐也無得著安息。（

13

看啊，迦勒底人的地此個百姓今無啦，亞述人互伊做野獸徛起的所在。起的守更樓，毀壞的宮殿，互伊做拋荒。）

14

他施的船隻啊，恁著哀哭，因為恁的衛所變做拋荒的所在。

15

當彼日，推羅欲互人記得歷過七十年，照一個王的日子。七十年後，推羅的景況欲親像妓女所唱的歌：

16

你此個互人記得的妓女啊，提琴四界行城內，彈好聽唱多多，互人閣記得你。

17

七十年後，耶和華欲眷顧推羅，伊就欲閣趁錢，及世上的萬國交關。

18

伊的貨物及所趁的錢欲做聖歸互耶和華，無欲囥無欲積聚；因為伊的貨物欲互踮佇耶和華面前的人，互食飽，閣穿擋得久久的衫。