以賽亞書 第 20 章 - 台語漢字羅馬本

1

亞述王撒珥根差他珥探到亞實突彼年，他珥探就攻破亞實突來取伊。

2

彼時，耶和華託仗亞摩斯的子以賽亞講：「去啊，你著解你腰裡的麻布，褪你腳裡的鞋。」以賽亞照按呢做，褪裼赤腳來行。

3

耶和華講：「我的奴僕以賽亞褪裼赤腳來行三年久，做關係佇埃及及古實的兆頭奇事。

4

親像按呢，亞述王欲將埃及的受掠者，古實的受遷徙者導去，無論老幼，褪裼赤腳，露出下體，互埃及見誚。

5

欲因為所向望的古實，所誇口的埃及，來驚惶見誚。

6

「彼時，諸個沿海徛起的百姓欲講：『看啊，咱諸個平素所向望者，就是咱因為欲脫離亞述王走去求伊拯救者，既然按呢，咱豈可會逃脫啊？』」