創世記 第 7 章 - 台語漢字羅馬本

1

耶和華對挪亞講：「你及你全家攏著入大船；因為佇此世代的中間，我看見你佇我的面前是義人。

2

見若清氣的精牲，你著帶七隻公的七隻母的；無清氣的精牲，你著帶一隻公的一隻母的；

3

天裡的鳥也著帶七隻公的七隻母的，通留的種活佇全地；

4

因為閣過七日，我欲落雨佇地上四十日四十暝，將我所造逐號的活物攏對地上剿滅。」

5

挪亞就照耶和華所命令伊的一盡去行。

6

當大水氾濫佇地上的時，挪亞六百歲。

7

挪亞就及伊的子伊的某伊的媳婦攏入大船，閃避大水。

8

清氣的精牲及無清氣的精牲，飛鳥及地上一切的蟲，

9

攏一對一對，有公的有母的，到挪亞遐進入大船，照上帝命令挪亞的。

10

過許個七日，大水氾濫佇地上。

11

當挪亞六百歲，二月十七日彼日，深淵的水源攏裂開天也破隙，

12

四十日四十暝落雨佇地面上。

13

抵抵彼日，挪亞及伊的子閃、含、雅弗，及挪亞的某及伊三個媳婦，攏入大船。

14

及百獸，各照伊的類，一切的精牲，各照伊的類，一切趖佇地上的蟲，各照伊的類，一切有翅的，各照伊的類，一切的飛鳥，各照伊的類，攏總進入大船。

15

見若肉體、內面有活氣的，攏一對一對到挪亞遐，入大船。

16

見若入大船的，是有公有母的肉體，照上帝所命令伊的。耶和華就給伊關。

17

水氾濫佇地上四十日，水漲愈高，互大船淐浮，船就離地。

18

水勢真大，佇地上直直漲起來，船漂流佇水面。

19

水勢佇地上極其大，天下的高山攏互伊淹密。

20

水勢比山加漲高十五肘，山攏互伊淹密。

21

見若佇地上有肉體的動物，就是飛鳥、精牲、走獸，及一切趖佇地上的蟲，以及所有的眾人，攏死。

22

見若佇乾地、有鼻孔喘氣的生靈攏死。

23

見若地上一切的活物攏剿滅，人及精牲、蟲，以及天中的飛鳥，攏對地上受剿滅，只有挪亞參許個及伊佇船裡的留。

24

水勢真大，佇地上歷過一百五十日。