創世記 第 50 章 - 台語漢字羅馬本

1

約瑟仆佇伊的老父的面啼哭，唚伊。

2

約瑟吩咐伺候伊的醫生用香料灌伊的老父，醫生就用香料灌以色列。

3

灌身屍定著的例著四十日；彼個四十日滿，閣埃及人為伊啼哭七十日。

4

為著伊啼哭的日已經過，約瑟對法老家內的人講：「我若佇恁的面前得著恩典，請恁通知法老給伊講：

5

『我的老父教我咒誓講：我欲死啦，你著將我埋葬佇迦南地，佇我為本身所掘的墓。』今求你准我上去埋葬我的老父，然後我欲倒轉來。」

6

法老講：「你通上去，埋葬你的老父照伊所教你咒的誓。」

7

對按呢約瑟上去埋葬伊的老父及伊相及上去的，有法老的眾人臣及法老家內的長老，及埃及國眾長老，

8

閣有約瑟全家及伊許個兄弟，以及伊的老父的家眷；只有的囝仔，及羊群牛群，攏留佇歌珊地。

9

閣有車及騎馬者，彼陣的人不止多。

10

到約但河外，亞達的五穀場，就佇遐大啼哭大哀傷。約瑟為著老父悲哀七日。

11

迦南地徛起的百姓看見亞達五穀場的啼哭，就講：「這是埃及人一場的大啼哭。」因為按呢彼個地名叫亞伯麥西，是佇約但河外。

12

雅各許個子就照老父所吩咐的給伊做，

13

許個子將伊運到迦南地，埋葬佇幔利的頭前、麥比拉田裡的穴；彼個穴及田是亞伯拉罕對赫人以弗崙買做業，來做墓地的。

14

約瑟埋葬老父以後，就及眾兄弟，以及一切及伊上去埋葬老父的人，攏倒轉埃及。

15

約瑟許個兄看老父已經死，就講：「豈採約瑟欲怨恨咱，照咱前款待伊攏總的歹一盡報應咱。」

16

就託人去見約瑟，講：「你的老父未死的代先，吩咐講：

17

『恁著對約瑟按呢講，前你諸個兄歹款待你，求你赦免的過失及罪惡。』今求你赦免你的老父的上帝的奴僕的過失。」對約瑟講諸個話，約瑟就啼哭。

18

伊諸個兄閣來仆佇伊面前，講：「阮是你的奴僕。」

19

約瑟給講：「呣免驚，我豈替上帝嗎？

20

前恁的意思是歹，總是上帝的意思是好，欲保全多多人的生命，親像今仔日。

21

今恁呣免驚，我欲養飼恁及恁的子兒。」對按呢約瑟用親愛的話安慰。

22

約瑟及老父的家眷攏　埃及。約瑟食百一歲。

23

約瑟得著看見以法蓮第三代的孫。瑪拿西的孫、瑪吉的子約瑟亦抱佇腳頭窩。

24

約瑟對伊的兄弟講：「我欲死啦，總是上帝的確看顧恁，導恁對此所在上去，到伊咒誓應允互亞伯拉罕、以撒、雅各的地。」

25

約瑟教以色列的子孫咒誓講：「上帝的確照顧恁；恁著將我的骨頭運上去。」

26

約瑟死，抵仔百一歲。人用香料給伊灌，將伊收落棺，停佇埃及。