創世記 第 48 章 - 台語漢字羅馬本

1

諸個代誌了後，有人給約瑟講：「恁老父破病啦。」伊就導伊二個子瑪拿西、以法蓮相及去。

2

有人通知雅各講：「你看，你的子約瑟來欲尋你。」以色列就勉強起來坐佇眠床。

3

雅各給約瑟講：「全能的上帝曾佇迦南地的路斯對我出現，賜福我，

4

給我講：『我欲互你生湠多多，成做多多百姓，亦欲將此個地賞賜你的後裔，做永遠的業。』

5

我未到埃及你遮的代先，你佇埃及地所生二個子以法蓮、瑪拿西是我的，親像流便、西緬是我的一樣。

6

佇以後你所生的子就是你的，通歸佇二個兄的名下得著業。

7

論到我，我對巴旦來的時，拉結死佇我的目睭前，佇迦南地佇路裡的中間，離開以法他猶有一站，我就給伊埋葬佇以法他的路（以法他就是伯利恆）。」

8

以色列看見約瑟二個子，就講：「這是是誰？」

9

約瑟給老父講：「這是我的子上帝佇遮賞賜我的。」講：「請你導倚近我，我欲給祝福。」

10

以色列年老，目睭花，看見。約瑟導近倚伊的面前，伊就給唚嘴，抱。

11

以色列給約瑟講：「我無拍算會見著你的面，今上帝閣互我看著你的子。」

12

約瑟將二個子對伊二個腳頭窩中導出來，本身就仆落地拜。

13

後來，約瑟閣牽二個，正手牽以法蓮向以色列的倒手，倒手牽瑪拿西向以色列的正手，導近倚伊。

14

以色列伸正手，按以法蓮的頭殼，（伊是第二個），閣拍叉用倒手按瑪拿西的頭殼，（瑪拿西本是大子）。

15

伊就給約瑟祝福講：「願我的祖亞伯拉罕及我的父以撒所行佇伊面前的上帝，就是一生保養我到佇今仔日的上帝，

16

救贖我脫離一切的患難彼個使者，賜福互此二個囝仔。願歸佇我的名下及我祖亞伯拉罕、我的父以撒的名下。閣願佇世界中生湠真多。」

17

約瑟看伊的老父用正手按佇以法蓮的頭殼，無歡喜，就伊的老父的手，欲對以法蓮的頭殼徙到瑪拿西的頭殼。

18

約瑟給伊的老父講：「我的父啊，呣是按呢。此個是大子，求你用正手按伊的頭殼。」

19

伊的老父呣趁講：「我知，我的子，我知。伊亦欲成做一族，亦欲闊大。總是伊的小弟將來比伊卡大；伊的小弟的後裔欲成做多多族」。

20

當彼日就給祝福講：「以色列人欲指你來祝福人講：『願上帝互你親像以法蓮、親像瑪拿西一樣。』」對按呢立以法蓮佇瑪拿西的代先。

21

以色列閣給約瑟講：「我欲死啦，總是上帝欲及你佇，欲導恁倒去恁列祖的地。

22

我前用我的弓、我的刀對亞摩利人的手搶來彼塊地，我今互你，比你的兄弟得著卡加。」