創世記 第 26 章 - 台語漢字羅馬本

1

亞伯拉罕的時，頭一擺飢荒以後；彼所在閣有飢荒，以撒就去基拉耳，到非利士的王亞比米勒遐。

2

耶和華對伊出現講：「你呣通落去埃及，著住佇我所指示你的地。

3

你寄居佇此個地，我欲及你佇，賜福你，因為我欲將諸個地攏互你及你的後裔。我欲堅固我對你的父亞伯拉罕所咒的誓。

4

我欲加添你的後裔，親像天裡的星許多，閣欲將諸個地攏互你的後裔。閣地上萬國欲因為你的後裔得著福氣──

5

是因為亞伯拉罕聽我的話，守我的吩咐、我的命令、我的律例、我的法度。」

6

以撒徛起基拉耳。

7

彼所在的人問到伊的某，伊就講：「伊是我的小妹。」呣敢講：「是我的某」；心內想：「驚了彼所在的人為著利百加的緣故我」，因為伊面貌真娞。

8

伊佇遐已經久。非利士王亞比米勒對窗仔看，看見以撒及伊的某利百加滾笑。

9

亞比米勒叫以撒來，給伊講：「伊實在是你的某，你啥事講伊是我的小妹？」以撒講：「我心內想，驚了我為著伊來死。」

10

亞比米勒講：「你對阮所做的是甚麼事？百姓的中間險險有人及你的某相及睏，你就互阮陷落罪。」

11

對彼霎亞比米勒就吩咐眾百姓講：「凡若磕著此人及伊的某的，定著欲互伊死。」

12

以撒佇彼所在種作，彼年得著百倍。耶和華賜伊福氣，

13

伊就成做大，愈久愈大，到成做大富戶。

14

伊有羊群牛群，亦有多多奴僕，非利士人就怨妒伊。

15

當伊的老父亞伯拉罕佇的日，伊的老父的奴僕所開的井，非利士人攏給伊塞去，用土填滿。

16

亞比米勒給以撒講：「你著離開阮去。因為你比阮嶄然卡強盛。」

17

以撒就離開遐，佇基拉耳的山谷搭布棚，踮遐徛起。

18

當伊的老父亞伯拉罕佇的日所開許個水井，到亞伯拉罕死後互非利士人填去，以撒重再給伊開，猶原照老父所號的名來名許個井。

19

以撒的奴僕佇山谷掘，抵著一個活水的井。

20

基拉耳的牧者及以撒的牧者相爭，講：「此個水是阮的。」以撒就號彼個井的名叫埃色，因為及伊相爭。

21

閣開一個井，為此個井閣相爭，就叫伊的名西提拿。

22

離開遐，閣開一個井，無為此個井閣相爭，就給伊號名利河伯。是講：「耶和華今互阮開闊的地，阮欲佇此個地興旺。」

23

以撒對遐上去別是巴。

24

彼暝耶和華對伊出現，講：「我是你的老父亞伯拉罕的上帝，呣免驚！因為我及你佇，欲賜福你，互你的後裔興旺，攏是為著我的奴僕亞伯拉罕的緣故。」

25

伊就佇遐起一座壇，求叫耶和華的名，佇遐搭伊的布棚；以撒的奴僕就佇遐開一個井。

26

亞比米勒及伊的朋友亞戶撒以及伊的軍長非各，對基拉耳來見伊。

27

以撒對講：「恁既然怨恨我，教我離開恁，今啥事來我遮？」

28

講：「阮明明看見耶和華及你佇，呣值著咱中間你阮咒誓，互阮及你立約，

29

你無害阮，親像阮未曾磕著你，獨獨好款待你，送你安然倒去。今你是耶和華賜福者。」

30

以撒就為設筵席，就食就飲。

31

透早起來大家咒誓。以撒送起身，就安然離開伊去。

32

像彼日，以撒的奴僕來，將開井的事通知伊講：「阮得著水啦。」

33

伊就叫彼個井的名叫示巴；所以到今仔日彼個城的名叫做別是巴。

34

以掃四十歲的時娶赫人比利的查某子猶滴，及赫人以倫的查某子巴實抹做某。

35

此二個婦仁人常常互以撒及利百加心內大憂悶。