創世記 第 23 章 - 台語漢字羅馬本

1

撒拉享壽一百二十七歲，這是撒拉一生的年歲。

2

撒拉死佇迦南地的基列亞巴，就是希伯崙。亞伯拉罕來為著撒拉哀傷啼哭。

3

後來亞伯拉罕對死人的面前起來，給赫人講：

4

「我佇恁中間是寄居的出外人。求恁佇遮互我一個所在做塚地，通埋葬我的死人，互我無閣看見伊。」

5

赫人應亞伯拉罕給伊講：

6

「我的主請聽。你佇阮中間做上帝的牧伯，出在你佇阮的塚地內揀第一好的來埋葬你的死人；阮無一人呣容允你佇伊的塚地內埋葬你的死人。」

7

亞伯拉罕起來，對彼所在的人就是赫族俯腰，

8

對講：「恁若有意思欲互我埋葬我的死人，互我無閣看見伊，就請聽我，替我求瑣轄的子以弗崙，

9

將伊的田頭麥比拉的穴互我；伊通照足額的價數賣互我，互我佇恁中間有業通做墓地。」

10

當時以弗崙坐佇赫人的中間。對彼霎赫人以弗崙佇一切入伊的城門的赫人的面前應亞伯拉罕講：

11

「呣免，我的主聽我。我欲送你彼區田，連彼內面的穴亦互你，佇我同族的人的面前我互你，通埋葬你的死人。」

12

亞伯拉罕就佇彼所在的百姓的面前俯腰，

13

佇彼所在百姓的面前對以弗崙講：「你若肯，請聽我。我欲將田的價錢互你，你著收，互我通佇遐埋葬我的死人。」

14

以弗崙應亞伯拉罕講：

15

「我的主請聽我。田值得銀四百舍客勒，佇你我的中間欲算甚麼？做你埋葬你的死人。」

16

亞伯拉罕聽以弗崙的話，照伊佇赫人的面前所講的，將買賣通用的銀秤四百舍客勒互以弗崙。

17

對彼霎，以弗崙的田，佇麥比拉、幔利的頭前彼區田及彼內面的穴，及田內以及四圍一切的樹木，

18

佇赫族人及一切入伊的城門的人的面前，攏定著歸互亞伯拉罕做業。

19

後來，亞伯拉罕將伊的某撒拉埋葬佇迦南地幔利頭前的麥比拉田裡的穴。（幔利就是希伯崙）。

20

對按呢，彼區田及田裡的穴對赫人定著歸互亞伯拉罕做業來做墓地。