創世記 第 20 章 - 台語漢字羅馬本

1

亞伯拉罕對遐站站向南方徙去，住佇加低斯及書珥的中間，寄居佇基拉耳。

2

亞伯拉罕講到伊的某撒拉，就講是我的小妹，基拉耳王亞比米勒差人將撒拉導去。

3

暝時，眠夢中，上帝來，給亞比米勒講：「你是該死的人！因為你所導彼個婦仁人；是人的某。」

4

亞比米勒猶未親近伊；就講：「主啊！行義的百姓，你亦欲滅伊嗎？

5

彼人豈呣是本身對我講，『伊是我的小妹』嗎？就婦仁人也本身講：『伊是我的兄。』我做此個事是心端正手清氣。」

6

上帝佇夢中對伊講：「我本知你做此個事是心中端正；我才阻擋你，免得你得罪我，所以我無容允你摸著伊。

7

今你著將此人的某還伊；因為伊是先知，伊欲替你祈禱，你才會活。你若呣還伊，你著知，你及你所有的人攏得欲死。」

8

亞比米勒透早起來，叫眾奴僕來，將諸個代誌攏講互聽，許個人攏真驚。

9

亞比米勒叫亞伯拉罕來，對伊講：「你對阮所行的是甚麼事？我有甚麼得罪你，你竟然互我及我國內的人陷落重罪？你對我行呣應該行的事！」

10

亞比米勒閣對亞伯拉罕講：「你看見甚麼才做此個事？」

11

亞伯拉罕講：「我拍算此所在的人攏無驚上帝，欲為著我的某的緣故死我。

12

閣伊亦實在是我的小妹；像父各母，後來做我的某。

13

當上帝教我離開老父的家、四界行的時，我給伊講：『將來咱所到的所在，請你稱我講：伊是我的兄；這就是你款待我的恩。』」

14

亞比米勒將羊、牛、奴僕、女婢互亞伯拉罕，閣將伊的某撒拉還伊。

15

亞比米勒閣講：「你看，我的地攏佇你的面前，你通隨意徛起。」

16

閣給撒拉講：「我互你的兄一千銀，給你對全家做遮目睭的，今你佇一切攏無不是。」

17

亞伯拉罕祈禱上帝，上帝就醫好亞比米勒及伊的某，及女婢，就會生子。

18

因為耶和華為著亞伯拉罕的某撒拉的緣故，已經互亞比米勒家內的婦仁人會生子。