創世記 第 17 章 - 台語漢字羅馬本

1

亞伯蘭九十九歲的時，耶和華對亞伯蘭顯現，給伊講：「我是全能的上帝。你佇我的面前行做著完全，

2

我欲及你立我的約，互你的後裔極其多。」

3

亞伯蘭就仆落佇地裡；上帝閣及伊講話，講：

4

「我及你立我的約：你欲做多多國的父。

5

對今以後，你的名無閣叫做亞伯蘭，是欲叫做亞伯拉罕，因為我已經立你做多多國的父。

6

我欲互你的後裔極其多；國度對你來立，君王對你來出。

7

我欲及你以及你歷代的後裔設立我的約，做永遠的約，是欲做你及你的後裔的上帝。

8

我欲將你現在出外的地，就是迦南全地，賞賜你及你的後裔做永遠的業，我亦欲做的上帝。」

9

上帝閣對亞伯拉罕講：「你及你的後裔著歷代遵守我的約。

10

恁中間所有的查甫者攏著受割禮；這就是我及你以及你的後裔所立的約，是恁所著遵守的。

11

恁著割恁陽物的皮；這是欲做我及恁所立的約的記號。

12

恁歷代的查甫者，無論家內生的，抑是你的後裔以外用銀對外面人買的，已經出世八日，攏著受割禮。

13

你家內生的及你用銀買的，攏的確著受割禮。按呢，我的約欲下佇恁的身上做永遠的約。

14

無受割禮的查甫者，伊身軀既然無受割禮，是背我的約，的確對百姓的中間除去。」

15

上帝閣對亞伯拉罕講：「你的某撒萊呣通閣叫伊的名撒萊，伊的名欲叫做撒拉。

16

我欲賜福伊，我亦欲互你對伊得著一個子。我欲賜福伊，伊亦欲做列國的老母；欲有邦國的王對伊出。」

17

亞伯拉罕就仆笑，心內講：「一百歲的人猶會生子嗎？撒拉已經九十歲，猶會生養嗎？」

18

亞伯拉罕對上帝講：「但願以實瑪利活佇你的面前。」

19

上帝講：「呣是啦，你的某撒拉欲給你生一個子，你欲給伊號名叫以撒。我欲及伊設立我的約，做伊的後裔永遠的約。

20

論到以實瑪利，我亦聽你求：你看！我已經賜福伊，欲互伊興旺，加添極其多。伊欲生十二個族長；我亦欲互伊成做大國。

21

到明年此時，撒拉欲給你生以撒，我欲及伊設立我的約。」

22

上帝及亞伯拉罕講息，就離開伊上去。

23

抵抵彼日，亞伯拉罕照上帝所給伊講的，給伊的子以實瑪利及亞伯拉罕家內一切的查甫人，無論佇家裡生的，抑是用伊的銀買的，攏行割禮。

24

亞伯拉罕受割禮的時九十九歲。

25

伊的子以實瑪利受割禮的時十三歲。

26

抵抵彼日，亞伯拉罕及伊的子以實瑪利同受割禮。

27

家內所有的人，無論佇家裡生的，抑是用銀對外面人買的，攏及伊同受割禮。