創世記 第 15 章 - 台語漢字羅馬本

1

諸個代誌了後，耶和華的話佇異象中臨到亞伯蘭講：「亞伯蘭啊，你呣免驚！我是你的盾牌，是你極大的報賞。」

2

亞伯蘭講：「主耶和華啊！你欲互我甚麼？我已經無子，承接我的家業的就是大馬色人以利以謝。」

3

亞伯蘭閣講：「你無互我有後裔；彼個生佇我家內的是我的後嗣。」

4

耶和華閣臨到給伊講：「此人呣是欲做你的後嗣；對你本身出的才是做你的後嗣。」

5

就導伊出去外面，講：「你看天，算許個星，你算會了抑？」閣對伊講：「你的後裔亦欲親像按呢。」

6

亞伯蘭信耶和華，伊就給伊算做義。

7

閣對伊講：「我是耶和華，曾導你出迦勒底的珥城，為著欲將此個地互你做業。」

8

亞伯蘭講：「主耶和華啊，我怎樣會知欲得著此個地做業啊？」

9

伊給伊講：「你給我取一隻三年母的牛，一隻三年母的山羊，一隻三年公的綿羊，一隻鳩鵻，一隻鴿仔。」

10

伊就取諸個物來，逐樣對中破開做二旁，此旁及彼旁排相對，只有鳥無破開。

11

有鷹鳥落來，佇死的精牲的頂面，亞伯蘭就趕伊去。

12

日欲落的時，亞伯蘭睏重眠；忽然有真黑暗的大驚惶到佇伊。

13

耶和華對亞伯蘭講：「你的確著知，你的後裔欲出外佇別人的地，閣服事彼位的人；彼位的人欲苦楚四百年。

14

所欲服事的國，我欲辦，後來欲帶多多財物對遐出來。

15

你欲安然倒祖，食長歲壽，互人埋葬。

16

到第四代，欲倒來遮，因為亞摩利族的罪猶未貫滿。」

17

日落天暗，有出煙的爐及的火把對許個破旁的肉經過。

18

當彼日，耶和華及亞伯蘭立約，講：「我有將此個地，對埃及河到彼個大河，就是伯拉河，互你的後裔，

19

就是基尼、基尼洗、甲摩尼、

20

赫、比利洗、利乏音、

21

亞摩利、迦南、革迦撒、耶布斯諸個族的地。」