以斯拉記 第 3 章 - 台語漢字羅馬本

1

到第七月，以色列人已經徛起許個城；彼時百姓親像一人，聚集佇耶路撒冷。

2

約薩達的子耶書亞及伊的兄弟許個祭司，及撒拉鐵的子所羅巴伯及伊的兄弟，攏起來起以色列上帝的壇，通獻燒祭佇彼頂面，照上帝的奴僕摩西律法的冊所記載的。

3

起壇佇本舊的位，因為驚許個國的百姓，閣佇彼頂面獻燒祭互耶和華，就是早起下昏的燒祭，

4

也守搭寮仔節照所記載的，閣獻逐日的燒祭照的數額，照定著的例親像逐日所應該著的；

5

然後獻照常的燒祭，及每月初一的祭以及耶和華分別做聖的節期的祭，閣獻逐人甘心歡喜獻的祭互耶和華。

6

對七月初一起，獻燒祭互耶和華。總是耶和華殿的地基猶未下。

7

閣用銀互石匠、木匠，用飲食的物、及油，互西頓人、推羅人，互將柏香樹對黎巴嫩運到海到約帕，是照波斯王古列所允准的。

8

到耶路撒冷上帝的殿遐。第二年二月，撒拉鐵的子所羅巴伯，約薩達的子耶書亞及其餘的兄弟，就是祭司、及利未人，及一切對受掠的中間倒來耶路撒冷的人，攏起手；派利未人，對二十歲以上，督工起耶和華的殿。

9

對按呢耶書亞及伊的子及兄弟，甲篾及伊的子猶大的子孫，及希拿達的子及的子，的兄弟利未人，攏起來，督理許個佇上帝的殿做工的人。

10

起厝師傅下耶和華殿的地基的時，祭司穿禮服抬號頭，亞薩的子孫利未人提鐃鈸，攏徛欲謳咾耶和華，照以色列王大衛所定著的例。

11

有的唱有的和，謳咾感謝耶和華講：因為伊是好，伊永遠施慈愛互以色列。謳咾耶和華的時，眾百姓大聲喝，因為耶和華殿的地基已經下。

12

總是有多多祭司、利未人、族中的老大，就是曾看見前的殿許個老人，今親目看見下此間殿的地基，就大聲啼哭，也多多人為著歡喜大聲喝，

13

致到百姓會分別歡喜喝的聲及百姓啼哭的聲；因為百姓大聲喝的聲，互彼個聲聽到真遠。