以西結書 第 5 章 - 台語漢字羅馬本

1

「人子啊，你著抬一支利劍，做你的剃頭刀，來剃你的頭毛及你的嘴鬚，然後用厘戥戥伊的重輕來分伊。

2

圍困城的日已經滿，你著將三份的一份佇城內用火燒伊，將三份的一份佇伊的四圍用刀拍伊，將三份的一份撒散互風吹去；我亦欲拔刀追伊。

3

你著對彼中間提幾若支縛佇你的衫仔裾，

4

閣對彼中間提淡薄仔佇火中，用火燒伊。對遐欲有火出到佇以色列全家。

5

主耶和華按呢講：這是耶路撒冷。我欲安置伊佇列邦中；列國佇伊的四圍。

6

伊行歹，違逆我的法度，比列邦卡傷重；干犯我的律例，比四圍的列國卡慘，因為伊棄拺我的法度。我的律例，亦無遵趁。

7

所以主耶和華按呢講：因為恁擾亂比恁四圍的列邦卡傷重，無遵趁我的律例，無執守我的法度，亦呣趁恁四圍列國的法度，

8

所以主耶和華按呢講：看啊，我欲攻擊你，我欲佇恁中間審判恁，互列國親目看見；

9

閣因為一切可惡的事，我欲佇你中間行我所未曾行，以後亦無閣按呢行的。

10

因為按呢，佇你的中間老父欲子來食，子亦欲老父來食。我欲佇恁中間審判恁，我欲將你所剩的眾人攏四散佇四方。」

11

因為按呢，主耶和華講：「我指我的永活來咒誓，為著你用一切可惡的物、通厭賤的事拍垃墋我的聖所，我也欲減少你的人額，我的目睭無欲疼惜你，我亦無欲憐憫你。

12

你三份的一份欲對瘟疫來死，亦對飢荒來消滅佇恁中間；三份的一份欲佇你的四圍倒佇刀下；三份的一份我欲四散佇許個風，亦欲拔刀追。

13

「親像按呢我的受氣得著成；我大受氣的欲息，我就受安慰。閣我大受氣的已經成，就通知我──耶和華是熱心來講的；

14

我欲互你做冷靜做凌辱，佇你四圍的列邦中，互經過的人親目看見。

15

按呢，我欲用受氣及大受氣，及嚴嚴的責備，佇你的中間審判你。彼時，你就佇四圍的列邦中成做通凌辱、通譏刺、通鑑戒、通卬愕。這是我───耶和華講的。

16

彼時，我用飢荒會剿滅人的歹箭射，就是我所射來剿滅恁者，我亦欲加添恁的飢荒，斷絕恁所倚靠的米糧；

17

閣欲飢荒惡獸到恁遐，欲互恁的子死了了，閣瘟疫及人的事亦欲流行佇恁遐；我亦欲互刀劍臨到恁。這是我──耶和華講的。」