以西結書 第 47 章 - 台語漢字羅馬本

1

伊導我倒轉到殿門，看啊，有水對殿的門椗下向東流出（因為殿的頭前向東）。諸個水對下面，對殿的正旁，祭壇的南旁流落。

2

伊就導我對北門出去，導我對外面彎到外門，對向東旁的門的路，看啊，水對正旁爆出來。

3

彼人手提繩索向東行出去的時，伊就量一千肘，教我對水　過去，水淹腳目。

4

伊閣量一千，教我對水　過去，水淹腳頭窩；閣量一千，教我跟過去，水淹到腰；

5

閣量一千，水就成做河，我會跟過去。因為水漲淀，成做會泅得的水，　得的河。

6

伊就對我講：「人子啊，你有看見此個嗎？」伊就導我互我越轉到河邊。

7

我倒轉去的時，看啊，佇河邊雙旁有樹木真多。

8

伊給我講：「諸個水向東流去，欲落到亞拉巴，直直流到海。所發出的水欲流入鹽海，海裡的水就變好。

9

河水所到的所在，逐樣生湠的動物攏欲得著活，也欲有魚真多，因為水流到遐，海裡的水變好。彼個河所流到的所在，所有的物攏欲得著活。

10

將來欲有討漁人徛佇岸邊，對隱基底到隱以革蓮，攏做拋網的所在。許個魚各照伊的類，親像大海的魚真多。

11

總是爛土的地及水汐的所在得著醫好，留出鹽。

12

佇河的雙旁邊欲發生逐類的樹木；通做食物，葉枯焦，果子出無斷。逐月日欲結新的果子，因為諸個水是對聖所流出的。樹頂的果子欲做食物，葉有醫治的功用。」

13

主耶和華按呢講：「恁分此個地做業照以色列十二支派，伊的地界著親像下底。約瑟欲得著二份。

14

恁承接此個地做業，著相及平分；因為我曾抬起手應允將此個地互恁的列祖；此個地欲歸佇恁做業。

15

「地的界限就是按呢：北旁的界對大海去希特倫的路，直直到西達達出入的所在。

16

到哈馬、比羅他、西伯蓮（就是佇大馬色的境界及哈馬的境界的中間），到浩蘭邊界的哈撒哈提干。

17

對海的境界就是哈薩以難近佇大馬色的境界，閣佇北旁向北是哈抹的境界。這是北旁的界。

18

「東旁的界佇浩蘭、大馬色、基列，及以色列地的中間，就是約但河。恁著對北旁的界量到東海。這就是東勢的界。

19

「南旁向南的界是對他瑪到米利巴加低斯的水，續到埃及的溪，到大海。這是南旁向南的界。

20

「西旁的界就是大海，對南旁的境界直到哈馬出入對面的所在。這就是西旁的界。

21

「按呢恁著照以色列的支派為家己分此個地。

22

恁著拈鬮分此個地做業，歸佇恁本身及佇恁中間寄腳的出外人，就是佇恁中間生子查某子的。恁著看親像以色列家的中間所生者一樣；佇以色列支派的中間及恁相及得著地做業。

23

外面人徛起佇彼個支派的中間，恁就佇遐分地互伊做業。這就是耶和華講的。」