以西結書 第 35 章 - 台語漢字羅馬本

1

耶和華的話臨到我講：

2

「人子啊，你著面向西珥山宣傳，來攻擊伊，

3

對伊講，主耶和華按呢講：看啊，西珥山啊，我及你做對敵，我欲伸手攻擊你，互你冷靜，通互人卬愕。

4

我欲互你諸個城變做拋荒，互你冷靜。你就知我是耶和華。

5

因為你囥永遠的怨恨，佇以色列族抵著災禍，罪過結局的時，你將交互刀劍的勢力，

6

所以主耶和華按呢講：我指我的永活來咒誓，我的確互你抵著流血的報應，罪的確追趕你；你已經無怨恨人流血，所以此個罪的確追你。

7

我欲互西珥山拋荒冷靜，對遐往來的人我欲剪除伊。

8

我欲互伊許個山，受的人滿滿。互刀劍死者，欲倒佇你的小山，及山谷，及一切的坑溝。

9

我欲互你永遠拋荒，你諸個城的確無人徛起，就恁的確知我是耶和華。

10

「因為恁講：『此二國二個地方攏欲歸我，阮欲得著』（其實耶和華佇遐），

11

所以主耶和華按呢講：我指我的永活來咒誓，我欲照你的受氣，及照你為著怨恨來行佇的怨妒款待你。就我審判你的時，欲顯明家己佇中間。

12

你就知我──耶和華已經聽見你攻擊以色列諸個山所講的謗瀆，是講：『拋荒啦，已經交佇阮，互阮通吞伊。』

13

閣恁用嘴向我來家己誇口，加添恁諸個話來攻擊我，我聽見啦。

14

主耶和華按呢講：當全地歡喜的時，我欲互你拋荒。

15

你因為以色列家的基業拋荒來歡喜，我也欲按呢款待你。西珥山啊，你欲拋荒以及以東全地也按呢。就知我是耶和華。」