以西結書 第 31 章 - 台語漢字羅馬本

1

十一年三月初一，耶和華的話臨到我講：

2

「人子啊，你著對埃及王法老以及伊的眾人講：你許大塊是親像是誰？

3

看啊，亞述曾做黎巴嫩的柏香樹，枝椏真娞，蔭影親像樹林，樹身高大，枝尾伸入雲中。

4

許個水養伊大欉；深淵互伊發真高。伊許個江河踅流佇栽種伊的所在，拆叉的水，流到田園的樹木。

5

所以高大過田裡的眾樹；伊的枝真艷，伊的椏真長，因為佇伊發生的時有水多多。

6

空中的飛鳥攏佇枝頂作巢；田野的走獸攏佇枝下生子；多多大國攏踮佇伊的蔭下。

7

樹大枝長，成做真娞，因為根旋佇大水邊。

8

上帝園內的柏香樹遮伊著；松樹不及伊的枝；楓樹不及伊的椏；上帝園內諸個樹攏比得伊的娞。

9

我互伊的枝椏茂盛，成做娞，致到上帝園內伊甸一切的樹攏怨妒伊。」

10

所以主耶和按呢講：「因為你高大，枝尾伸入雲中，伊的心因為伊的高大來自高，

11

按呢，我欲將伊交佇列國中有大勢力者；伊的確欲辦伊。因為伊的罪惡，我趕逐伊。

12

外邦人，就是列邦中強暴者，將伊剉斷擲。伊的椏磕落佇山裡及一切的山谷中，伊的枝折，佇彼所在的河邊。地上的眾百姓已經落去，離開伊的蔭影。

13

空中的飛鳥攏欲歇佇此個衰敗的樹頂，田野的走獸攏欲住佇伊的樹枝，

14

通互水邊諸個樹無因為高大來自高，亦無將枝尾伸入雲中，閣許個得著水潤澤有勢力的，亦得著高大來徛起來。因為佇世間人的中間，及落陰間的人攏交互死無，到深深的地下。」

15

主耶和華按呢講：「伊落陰間的彼日，我互人悲哀。我為著伊遮蓋深淵，約束江河，互大水停流；我亦互黎巴嫩為著伊凄慘，田野諸個樹攏因為伊昏去。

16

我將伊落陰間，及落坑的人相及落去。彼時，列國聽見伊墜落的聲，就攏振動，伊甸一切的樹──黎巴嫩得著水潤澤、第一好第一娞的──攏佇地下深的所在受安慰。

17

亦及伊相及落陰間，到受刀的人遐。曾做伊的手骨，佇列國中徛起伊的蔭影下。

18

佇諸個榮光高大，佇伊甸諸個樹中，你親像是誰？總是你欲及伊甸諸個樹相及落去地下深的所在，你欲及受刀的人，倒佇無受割禮的人的中間。「這就是法老及伊的眾百姓。這是主耶和華講的。」