出埃及記 第 30 章 - 台語漢字羅馬本

1

「你著做一座壇通燒香用皂莢柴做伊。

2

長一肘，闊一肘，款式四方的，高二肘；伊許個角著及壇連做一塊。

3

壇及伊的頂面及伊的四圍，及伊許個角，攏用好金包伊；也著佇伊的四圍齒金線。

4

你著做二個金環安佇齒線的下面，著做佇壇的雙旁，二支橫杆的頂面，諸個環著做串槓的路用，通扛壇。

5

著用皂莢柴做槓，用金包。

6

你著用壇下佇倚近法櫃的帳簾前，佇法櫃頂施恩所的頭前，就是我欲及你相會的所在。

7

亞倫佇壇頂著燒芳料所做的香；逐早起伊整頓燈的時，著燒伊。

8

到黃昏亞倫點燈的時，也著燒伊，是做恁逐世代常常燒的香，佇耶和華的面前。

9

佇此個壇頂呣通獻別號的香，也呣通獻燒祭及素祭，也呣通灌奠佇伊的頂面。

10

亞倫著一年一擺佇壇頂的角贖罪。伊一年一擺著用贖罪祭的血佇壇頂贖罪，逐世代著按呢。此個壇佇耶和華的面前做至聖。」

11

耶和華吩咐摩西講：

12

「你算以色列人的人額，照中間所上算者，你算的時，逐人著為著家己的生命用贖回的價錢獻互耶和華，免得你算的時佇中間有災禍。

13

見若過去歸佇許個上算者，逐人著照聖所的秤，提出半舍客勒的銀；此半舍客勒是獻互耶和華的（一舍客勒是二十個季拉）。

14

見若過去歸佇許個上算者，對二十歲以上的，著將此個獻互耶和華。

15

為著贖回恁的生命將此個獻互耶和華的時，好額人呣通出卡多，喪鄉人也呣通出卡少，逐人準準出半舍客勒。

16

你著對以色列人收此個贖回的銀，做會幕的路用，通佇耶和華的面前為以色列人做紀念，來贖回恁的生命。」

17

耶和華吩咐摩西講：

18

「你著用銅做洗盪的盆，伊的座也著用銅做通用伊洗盪。著下伊佇會幕及壇的中間，內面著貯水。

19

亞倫及伊的子欲佇遐洗的手的腳。

20

入會幕，抑是就近壇前服事用火燒祭服事耶和華的時，著用水洗，免得死無。

21

著按呢洗手洗腳免得死無。這是做定著的例就是做伊及伊的後裔逐世代永遠的例。」

22

耶和華閣吩咐摩西講：

23

「你著取上品的香料，就是專的沒藥五百舍客勒，芳的肉桂一半，就是二百五十，芳的菖蒲二百五十，

24

沈香五百，攏照聖所的秤，及橄欖油一欣，

25

你著用伊做通抹的聖油就是照做芳味的法調和伊，是欲做通抹的聖油。

26

著用此個油抹會幕及法櫃，

27

桌及桌頂一切的器具，燈台及燈台的器具，以及香壇、

28

燒祭的壇，及伊一切的器具，洗盪的盆及伊的座。

29

你著互做聖，互成做至聖；見若摸著伊的攏分別做聖。

30

你著用油抹亞倫及伊許個子，互做聖，通做祭司來服事我。

31

你著給以色列人講：『此個油，欲做我的聖油做抹的路用到恁逐世代。

32

呣通倒佇人的身軀，也呣通照此個調和的法做及此個相親像的。此個油是聖，恁也著掠伊做聖。

33

見若調和及此個相親像，抑是用伊抹佇外人的身軀的，欲對伊的百姓的中間受剪除。』」

34

耶和華對摩西講：「你著取芳的香料，就是哪噠、柢茴力、赫比拿；諸個芳芳的香料及清的乳香逐樣秤平重。

35

你著用諸個做香，照做芳味的法來做芳料用鹽調和，互伊清氣閣聖。

36

此個香你著提淡薄，舂互伊真幼，下佇會幕內、法櫃前，我欲佇遐及你相會。恁著掠伊做至聖。

37

恁所做的香呣通照此個調和的法為著家己來做；恁著掠伊做聖，歸佇耶和華。

38

見若做親像此款的香，愛欲鼻芳的，欲對伊的百姓中受剪除。」