出埃及記 第 2 章 - 台語漢字羅馬本

1

有一個利未族的人去娶一個利未族的查某囝仔。

2

彼個婦仁人懷孕，生一個子，看見伊是清秀的囝仔，就囥伊三月日久，

3

後來看閣囥得，就為著伊取蘆竹仔的箱，用石油及瀝青糊伊，將囝仔下佇彼內面，橐佇河邊蘆葦的中間。

4

伊的大姐遠遠徛，愛知伊會抵著怎樣。

5

法老的查某子落來河裡欲洗浴，伊許個女婢行遊佇河邊。伊看見蘆葦的中間有箱，就差一個女婢夯來。

6

掀開，看見囝仔。看啊，囝仔哮，伊就憐憫伊，講：「這就是希伯來人的囝仔。」

7

伊的大姊給法老的查某子講：「我去佇希伯來婦仁人的中間叫一個奶母，給你育此個囝仔，好嗎？」

8

法老的查某子給伊講：「你通去啊！」查某子就去叫囝仔的老母。

9

法老的查某子給伊講：「抱此個囝仔去，給我育伊，我欲互你工錢。」婦仁人就抱囝仔去育伊。

10

囝仔漸漸大，婦仁人就帶伊到法老的查某子遐，做伊的子。伊給伊號名叫摩西，講：「因為我對水裡救伊出來。」

11

後來，摩西已經長成，伊出去到伊的兄弟遐，看見擔壓，看見一個埃及人拍一個希伯來人就是伊的兄弟。

12

伊看左右，看無人佇遐，就拍死埃及人，掩佇沙裡。

13

隔日閣出去，看見有二個希伯來的人相拍，就對彼個呣著者講：「你啥事拍你的同伴？」

14

彼個人講：「是誰設立你做首領及審判官來管阮？你想欲拍死我，親像拍死彼個埃及人嗎？」摩西驚，講：「此個代誌真正露出。」

15

法老聽見此個代誌，就想欲　摩西，總是摩西閃避法老，走去米甸地徛起。

16

坐佇井邊。米甸的祭司有七個查某子；來汲水，到滿槽，互老父的羊群飲。

17

許個顧羊者到，趕，摩西就起來幫助，互的羊群飲。

18

來到老父流珥遐；伊講：「今仔日恁怎樣許緊倒來？」

19

講：「有一個埃及人救阮脫離顧羊的人的手，閣替阮出力汲水互羊群飲。」

20

伊對伊許個查某子講：「彼個人佇叨落？恁啥事放伊佇遐？著請伊來食。」

21

摩西願及彼人踮；伊就將伊的查某子西坡拉嫁互摩西。

22

生一個子，摩西給伊號名叫革舜，因為講：「我寄腳佇外邦。」

23

歷過多多年，埃及王死。以色列人因為做苦工，就吐氣喉叫，做苦工喉叫的聲到互上帝聽見。

24

上帝聽見的譆譆孱，上帝就記得伊及亞伯拉罕、以撒、雅各所立的約。

25

上帝看顧以色列人，上帝也知的代誌。