出埃及記 第 18 章 - 台語漢字羅馬本

1

摩西的丈人，米甸的祭司葉忒羅，聽見上帝為摩西及伊的百姓以色列所行一切的事，就是耶和華導以色列出埃及的事，

2

摩西的丈人葉忒羅帶摩西的婦仁人西坡拉來，就是摩西前差伊倒去的，

3

閣帶伊二個子，一個名叫革順，因為摩西講：「我寄腳佇外邦」；

4

一個名叫以利以謝，因為伊講：「我的父的上帝幫助我，救我脫離法老的刀。」

5

摩西的丈人葉忒羅帶摩西二個子及伊的婦仁人來到上帝的山，就是摩西佇曠野紮營的所在。

6

給摩西講：「我是你的丈人葉忒羅，帶你的婦仁人及伊二個子來你遮。」

7

摩西出去迎接伊的丈人，對伊鞠躬，及伊唚嘴，相及問平安，就入布棚。

8

摩西將耶和華為以色列的緣故對法老及埃及人所行一切的事，以及路裡所抵著一切的為難，及耶和華怎樣拯救，攏排列互伊的丈人聽。

9

葉忒羅因為耶和華款待以色列人一切的好事，救脫離埃及人的手，就真歡喜。

10

葉忒羅講：「耶和華是應該謳咾者；伊救恁脫離埃及人的手，也脫離法老的手，救此個百姓出埃及人的手下。

11

今我知耶和華比諸個上帝卡大，就是對許個埃及人驕傲款待此個百姓的事。」

12

摩西的丈人葉忒羅將燒祭及別號的祭獻互上帝。亞倫及以色列的長老攏來，及摩西的丈人相及食佇上帝的面前。

13

隔日，摩西坐審判百姓，百姓對早起到下昏攏徛倚佇摩西的身邊。

14

摩西的丈人看見伊對百姓所做一切的事，就講：「你對百姓做的是甚麼事啊？你啥事家己坐，眾百姓對早起到下昏攏徛佇你的身邊啊？」

15

摩西應伊的丈人講：「這是因為百姓到我遮，來問上帝。

16

有代誌的時就來我遮，我就佇雙旁的中間給判斷；互知上帝的律例及法度。」

17

摩西的丈人對伊講：「你按呢做呣好。

18

你及你諸個百姓會真損身；因為此個事互你甚重，你家己一人做來。

19

今你著聽我的話。我替你拍算，願上帝及你佇。你著替百姓到上帝面前，將案件請問上帝；

20

閣著將律例及法度教示，指示所著行的路，所著做的事；

21

也著對百姓的中間揀有才能的人，就是敬畏上帝、誠實無濫糝、怨恨不義的錢彼號人，設立做百姓的序大，有的管一千人、有的管一百人、有的管五十人、有的管十人，

22

互照時審判百姓，大事著互到你遮，小事通家己審判。按呢，你就卡減輕，也通及你相及擔當。

23

你若按呢行，上帝也按呢吩咐你，你就接載會住，諸個百姓也通安然到伊的所在。」

24

對按呢，摩西聽趁伊的丈人的話，攏照伊所講的去行。

25

摩西對以色列人中間揀有才能的人，設立做百姓的序大，有的管一千人、有的管一百人、有的管五十人、有的管十人。

26

照時審判百姓，有得的案件就到摩西遐，若是逐項小事就家己審判。

27

後來，摩西送伊的丈人起身，伊就倒去本所在。