出埃及記 第 13 章 - 台語漢字羅馬本

1

耶和華吩咐摩西講：

2

「以色列中無論人及精牲，見若頭上的大子，攏著分別做聖歸佇我，因為本是我的。」

3

摩西給百姓講：「恁著記念此日，就是恁對埃及地對做奴才的家出來，因為耶和華用大權能的手，導恁對遮出。有酵的餅攏呣通食。

4

佇亞筆月間此日是恁出來的日。

5

將來耶和華導恁入迦南、赫、亞摩利、希未、耶布斯許個族的地，就是對你的祖公咒誓應允互你彼個流奶及蜜的地，彼時你著佇此月間守此個禮。

6

你著食無酵餅七日，到第七日就是耶和華的節。

7

此七日久，著食無酵餅；佇你的四境內呣通看見你有下酵的餅，也呣通看見你有酵母。

8

當彼日，你著給你的子講：『這是因為耶和華佇我出埃及的時所給我行的事。

9

這欲給你做記號佇你的手，做紀念佇你的頭額，互耶和華的律法常常佇你的嘴，因為耶和華曾用大權能的手導你出埃及。

10

所以逐年到期你著守此個例。』」

11

「將來耶和華欲照伊對你及你的祖公所咒誓的，導你入迦南人的地，將此個地賞賜你，

12

彼時你著將一切頭胎的查甫子，及所有頭水公的精牲，歸互耶和華；諸個攏屬耶和華。

13

見若頭水生的驢，著用羊仔替贖；若無欲替贖，就著摃折伊的頷頸。見若你頭上的查甫子攏著替贖。

14

日後你的子問你講：『這是甚麼緣故？』你著對伊講：『耶和華用大權能的手，導阮對埃及對做奴才的家出來。

15

彼時法老固執呣准阮去，耶和華就將埃及地所有頭胎的，無論是人的大子抑是精牲的頭水的，攏害死。因為按呢，我將頭水的公的獻互耶和華做祭，獨獨我的大子攏用替贖。

16

這欲做記號佇你的手，做紀念縖佇你的頭額，因為耶和華用大權能的手導阮對埃及出來。』」

17

法老准百姓去的時，非利士地的路雖然卡近，總是上帝無導對遐去；因為上帝講：「驚了百姓抵著交戰，就退悔倒轉去埃及。」

18

所以上帝導百姓，彎對紅海曠野彼條路去。以色列人攏排隊伍，對埃及地出去。

19

摩西帶約瑟的骨頭及伊去；因為約瑟曾切切教以色列人咒誓，對講：「上帝的確眷顧恁，恁著帶我的骨頭對遮相及去。」

20

對疏割起身，紮營佇近曠野的以倘。

21

耶和華行佇的頭前，日時，佇雲柱中導的路；暝時，佇火柱中光照，互日暝攏通行。

22

日時的雲柱，暝時的火柱，攏無離開百姓的頭前。