出埃及記 第 11 章 - 台語漢字羅馬本

1

耶和華給摩西講：「我欲閣互一項災禍到佇法老及埃及，然後伊欲准恁離開遮。伊准恁去的時，欲趕恁攏對遮出去。

2

你著傳互百姓聽，互男女逐人對的厝邊討金器、銀器。」

3

耶和華互百姓得著恩典佇埃及人的面前，閣摩西此人佇埃及地、佇法老人臣的目睭中，及百姓的目睭中看做尊大。

4

摩西講：「耶和華按呢講：『約略半暝，我欲出去遍行埃及。

5

見若佇埃及地的大子，對坐位的法老的大子到佇挨磨的女婢的大子，及一切的精牲頭水生的，攏欲死。

6

埃及遍地欲有大啼哭的聲；從前未曾有按呢，後來也無閣按呢。

7

論到以色列中，無論是人是精牲，連狗也呣敢吠，互恁知耶和華佇埃及人及以色列人的中間有分別。』

8

你許個人臣攏欲落來見我仆佇我面前，講：『求你及跟隨你的百姓攏出去』，然後我欲出去。」對按呢摩西大受氣，離開法老出去。

9

耶和華給摩西講：「法老無欲聽恁，互我的奇事佇埃及地加添愈多。」

10

摩西、亞倫佇法老的面前行這一切的奇事；總是耶和華互法老的心硬，呣准以色列人離開伊的地。