以斯帖記 第 5 章 - 台語漢字羅馬本

1

第三日，以斯帖穿王后的禮服，徛佇王宮的內院，佇王宮的對面。彼時王佇王宮內坐伊的王位，佇王宮的門的對面。

2

王看見王后以斯帖徛佇院內，伊就得著恩典佇王的目睭前，王抬起手中所抬的金枴仔向以斯帖；以斯帖就進前摸伊枴仔的尾溜。

3

王對伊講：「王后以斯帖啊，你欲揲甚麼？欲求甚麼，就若國的一半也欲互你。」

4

以斯帖講：「王若掠做好，就請王及哈曼今仔日來赴我為著伊所設的筵席。」

5

王就講：「命令哈曼緊緊來通照以斯帖所講的去行。」王及哈曼就去赴以斯帖所設的筵席。

6

佇酒筵的中間，王閣給以斯帖講：「你所請是甚麼，欲互你；你所求是甚麼，就若國的一半也欲做成伊。」

7

以斯帖應講：「我所請，所求的是按呢。

8

我若得著恩典佇王的目睭前，王若歡喜允准我所請，行我所求的，就請王及哈曼來赴我所欲替設的筵席。我明仔日欲照王所講的來行。」

9

彼日哈曼歡喜，心內快樂就出來；總是哈曼看見末底改佇王的門無起來，也無為著伊來振動，就滿心受氣末底改。

10

總是哈曼家己勉強惴倒去厝，就差人叫伊的朋友及伊的某細利斯。

11

哈曼就將伊富有的榮光，及子兒的多，及王高升伊舉起伊過王許個首領人臣的頂面，攏講互聽。

12

哈曼閣講：「王后以斯帖，除去我以外呣准甚麼人及王赴伊所設的筵席。明仔日我又閣及王互伊請；

13

總是我看見猶大人末底改坐佇王的門，就此個攏無利益佇我。」

14

伊的某細利斯及伊的眾朋友給伊講：「著　一個柴架高五十肘，明仔早起求王吊末底改佇彼頂面，然後你通歡歡喜喜及王去赴筵席。」哈曼謳咾伊的話好，就教人　柴架。